قصة ريم ومهند الحدوتة الثانية

الحدوتة الثانية ..
‫#‏ريم_مهند‬
* الليل صفحة نهار انتهت صلاحيتها .. وضعف وخوف .. إلا بقى لو معاك حبيبك ساعتها بس ممكن يبقى الليل هوا مصدر الالهام*
ايمان (انتيم ريم) : شايفه يا بت الحب .. هوا الاحساس ده أظن حلو كده ؟.
ريم : ملناش دعوة .. ملناش دهوة يا موهي .. نسيب الناس في هالها .. بس عارفة انا ساعات بحس ان البنات دي عندها أوبشن تاني مش عندي .. بس غالبا لما .......
ايمان (بصوت سعاد حسني في فيلم عائلة زيزي): تاتا تا ..
ريم (متنحة وحطه ايديها على بؤها) : ايه ده ؟ (بصوت عالي)
ايمان : هديتك يا روح قلبي ..
ريم : عروسة .. الله الله.. مش مصدقه حلاوتها .. حلوة اوي
ايمان: عجبتك ؟
ريم : ههههههه .. الله بجد .. حضن بقى
ايمان : نبطل تحرش بقى هههههه
ريم : هههههههه
* بيحضنوا بعض وكالعادة دموعهم سبقتهم .. لا وبيضحكوا كمان .. يا اخوانا الكائنات دي رقيقة بشكل ؟.. أصل ساعات الحضن بياخدك لبعيد أبعد مما تتصور .. تدوب جواه وتنسى حدود المكان .. بتحس انك رجعت طفل تاني .. وبتتجرد من كل همومك ومشاكلك وغدر الزمان*
ريم : انتي كفاية عليا ..انتي الحب كله والله
ايمان :أموت أنا فـ المزز
ريم (بتضربها فـ كتفها) : اتلمي يا بت
ايمان : هههههههه ماشي يا رقيق انت
ريم (بتداري كسوفها) : حلوه أوي العروسة .. شبهي صح ؟
ايمان : انتي احلى يا بت .. عقبال ما اشوفك عروسه كده ..
ريم : ياااااارب احنا الاتنين فـ يوم واحد
ايمان : يااارب
* البنت لما بتدعي بحاجة عاوزاها غالبا بترفع ايديها فـ وضع الدعاء .. ملائكيتها الأصلية بتساعدها على استحضار خشوع الدعوة .. رقتها المعهودة بتنمي عندها القرب من ربنا .. براءتها اللي مفيش شك فيها بتقربها من أهدافها *
.........................................
‫
‫#‏أحمد‬
أحمد (انتيم مهند) : ايه الحلاوة دي يا عم الحاج ؟
مهند: دي أقل امكانياتي ..
أحمد : هههههه عارف عارف .. معاك سجاير ؟
مهند : آه آخر واحده .. متغلاش عليك يا صاحبي
أحمد : أصيل يا ابو رحاب ..عازمك على كشري بمناسبة الفلانتين
مهند : ماشي والشاي عليا .. يلا بينا ..
أحمد : حبيب قلبي هات حضن بالمناسبة السعيدة دي
مهند : ومالو مش عيب ..
أحمد (مقتربا) : انا هعلمك الحضن يااض
مهند (بيبعده): خلاص عرفته عرفته .. خلاااااص .. ده انت رخم
أحمد : ههههههههههههههه
مهند : هههههههههههههههه
* الولاد غير البنات فـ موضوع الحضن ده .. الحضن قليلا لما بيعبر عن احساس دفا .. في الاغلب بيبقى حضن سريع .. حضن هزار .. حضن وداع .. حضن لقاء .. مدته ثواني .. معلش .. الطبيعة بتحكم*
.....
* بيعدي شاب معاه ورق فيه اعلان عن كورسات انجلش وكومبيوتر وجرافيك وبيوزع على كل الشباب فـ المكان *
ايمان : خدي يا ريمه احنا لازم نروح ..انا عارفة المعهد ده .. وأسعاره حلوة
ريم : ماشي نتصل بيهم بكرة نحجز
.....
أحمد : أنا دايس فـ الكورسات دي عاوز اظبط اللغة .. ايه رأيك ؟
مهند: قشطة انا معاك .. يلا بقى نروّح عشان انا مواعد أمي أتعشى معاها.
أحمد (ساخرا): يعجبني فيك حنيتك
مهند: ماشي يا عم اللذيذ يلا بينا .. خد بالك على نفسك .. هكلمك بكره
أحمد : ماشي وانت كمان يا معلم .. سلام
...
‫#‏إيمان‬
* ايمان وريم ماشيين في طريقهم للبيت .. وراهم شباب بيعاكسوهم وهما بيمشوا بسرعه عشان يتفادوهم .. مهند وهوا مروح بيشوف المشهد ده وهيحاول يحميهم .. بيروح ناحية الشباب بسرعه .. وبيتكلم معاهم وقلبت بشد وجذب .. ومن هنا لهنا الناس اتدخلت تفصل بينهم .. هوا اتعور آه .. بس على الاقل قدر يبعد البنات عنهم والبنات جريوا وركبوا تاكسي ..مهند كان في حملة امسك تحرش وتصرفه ده كان منطقي جدا على فكرة*
ايمان (بتبص من الشباك ع الخناقة): الشاب ده محترم أوي .. ربنا بعته فـ الوقت المناسب
ريم (دموعها نزلت وهيا بتتابع) : اه شكلهم ضربوه .. أنا خايفه عليه .. وعلى نفسي .. ليه بيحصل كده يا مونه .. أنا بقيت بكره النزول .. بحس دايما بالاهانة وانا بتعامل مع البشر .. احساس صعب لما بتبقي مش قادرة تاخدي حقك وتوقفي اللي قدامك عند حده..
إيمان (بطبطبه): اهدي حبيبتي معلش .. ربنا ينتقم منهم
ريم : يارب .. استني ماما بتتصل .. ايوة يا ماما انا جايه فـ السكة .. مفيش حاجة يا ماما .. والله انا كويسه
ايمان : هاتي أكلمها .. ايوه يا طنط .. مفيش ده شباب كانوا بيعاكسونا والحمد لله عدت على خير .. متقلقيش أنا هوصلها تحت البيت ...
......
‫#‏أم_مهند‬
مهند (محاولا إخفاء الجرح) : السلام عليكم يا حاجه
أم مهند : وعليكم السلام يا حبيبي .. مهند .. ايه ده ؟
مهند : نعمين .. اه الطقم حلو صح ؟
أم مهند : انت هتستعبط ؟ ايه اللي فـ وشك ده ؟ ايه اللي شلفطك كده ؟ تاني اتخانقت عشان المعاكسات ؟
مهند : امممم تقريبا .. في أكل ؟
أم مهند : متغيرش الموضوع .. يابني مش كل يومين ترجع متخانق .. انا خايفة عليك ..
مهند : حاضر يا حاجة .. بس إيه الحلاوة دي .. عمّال تحلو يا قمر انت ..
أم مهند : بس يا واد .. انت هتعاكسني ولا ايه؟
مهند (ضاحكا): آه بجرب المعاكسة .. دي طلعت لذيذه أوي
أم مهند : طب بس يا اهبل ويلا نتعشى ..
*حصريا مع اللي متأكدين انهم بيحبونا بنبقى ناس بسيطة ومش بنتكسف نوريهم ضعفنا فـ بنضحك و بنبكي من كتر الفرح والزعل والجفا والقرب .. الضحك و البكا مش رمز ضعف يا اخوانا .. ده دليل وجود قلب فـ الكائن ده*
..............................................
وإلى لقاء آخر نكمل فيه الحكاية .

• 

•