ريم ومهند الحدوتة الثالثة

الحدوتة الثالثة ...
‫#‏مهند_ريم‬
.....................................
*حصريا مع اللي متأكدين انهم بيحبونا بنبقى ناس بسيطة ومش بنتكسف نوريهم ضعفنا فـ بنضحك و بنبكي من كتر الفرح والزعل والجفا والقرب .. الضحك و البكا مش رمز ضعف يا اخوانا .. ده دليل وجود قلب فـ الكائن ده*
....
* أم ريم كانت بتتابعها بالتليفون لحد ما وصلت البيت .. التوتر والقلق على اللي لينا فـ الدنيا بقى مسيطر على كل بيت .. مستنياها فـ البلكون و كل تاكسي معدي تفتكره هيقف تحت البيت .. لحد ما وصلت .. اتنهدت وقالت الحمد لله و أخدت نفسها وجريت على باب الشقة تفتحه وتستنى ريم*
....
*أحمد شخصية كوميدية جدا .. من الناس اللي حياتهم أحداثها قليلة .. من الناس اللي بترضى بالقليل .. يحب الهزار جدا ويفضله على الجد .. وجهة نظره ان الدنيا اتفه م التفاهة ومتستاهلش اننا نعافر فيها.. بياخد قرارات كتير فـ حياته ومبيوصلش لحاجة .. مش رومانسي لكن مستعد يعمل ده عشان يحتفظ بعلاقته بأي بنت .. بيشرّح الكتاب وبرضو ينجح بـ مقبول .. لما رجع البيت وفتح باب الشقة لقى النور مقطوع كالعادة ونادى في حد هنا ؟ .. مفيش رد .. إذاً محدش فـ البيت.. طلع موبايله يدور على الكشاف وقرر ميخافش ودخل وقفل الباب وبدأت أحداث طويلة لم يكن يتوقعها*
....
‫#‏ريم‬
أم ريم (بتحضن ريم على باب الشقة): حبيبتي .. حمدلله على سلامتك ..
ريم : متخافيش عليا يا ماما أنا كويسه
أم ريم : لا يا حبيبتي انا عارفاكي كويس .. رجلي على رجلك بعد كده .
ريم (دخلت معاها وقفلت الباب): انتى بتقولي ايه يا ماما .. انا كبرت على كده .. بس عارفه يا ماما .. انا من ساعة بابا ما مات وأنا حاسه اني خايفة وضعيفة .. ربنا يرحمه حبيبي وحشني أوي .. عاوزة أروحله
أم ريم : ربنا يرحمه ويغفرله تعالي نزوره بكرة
ريم : ماما أنا عاوزة أروحْله
أم ريم: عاوزة تموتي يا ريم ؟ وتسيبيني ؟ بعد ما اخواتك اتجوزوا انتي اللي بقيالي يا حبيبتي ..
ريم : خلاص متزعليش يا ماما نروح نزوره بس ..
أم ريم : طب يلا عشان تتعشي
ريم : مليش نفس هدخل انام.. مصدعه جدا ..معلش يا ماما .. انا أكلت بره .
أم ريم : طيب الاكل عندك فـ اوضتك .. نامي بدري عشان نصحى نروح نزور قبر بابا ..
ريم : حاضر يا ماما ..
أم ريم : حضرلك الخير يا ريم
* بتسيبها الام وبتقوم رايحة ناحية باب أوضتها *
ريم : ماما ماما
أم ريم (بترجعلها بسرعه) : مالك يا روحي ؟
ريم : أنا خايفه
أم ريم (بتحضنها): خلاص تعالي نامي فـ سريري يلا .. وبالمرة تديني الدوا وتحطيلي قطره فـ عيني ..
.....
* ايمان شخصية قوية .. بنت بـ مية راجل .. جدعة جدا مع اصحابها .. متحبش فـحياتها حاجتين .. الكدب والخيانة.. مستعدة للمعارك دايما .. مبتسبش حقها .. حبت وهيا صغيرة بس طلع بيلعب بيها واكتشفت خيانته وظبطته متلبس في احدى الاماكن العامة وفرّجت عليه أمة لا اله الا الله .. ومن ساعتها مبتصدقش الرجالة فـ كلامهم وبتعتبرهم كلهم نسخة واحدة يجوز حرقهم فـ محرقة عامة.. بس طبعا هيا مش بتبين كتير الموضوع ده*
......
‫#‏أحمد‬
* فـ شقة أحمد*
*أحمد ماشي في الشقة على طراطيف صوابعه أصله بيقلق من الضلمة وكل ما عربيّة تعدي ف الشارع نورها بيبان عنده يحس ان في حاجة هتظهرله وفجأة ظهرله كائن ما.. وشه هيكل عظمي ..ولطشه بالقلم *
أحمد : أعوذ بالله من الشيطان الرجيم أ أأ.. أنا نسيت الـ...
- ايه يا حيوان متأخر ليه ؟
أحمد : أنا أنا أنا متأخرتش.. لسه بدري سعادتك.. حاضر مش هتأخر
- اعتبر ده وعد يا حيوان ؟
أحمد : طبعا طبعا.. انصرف .. قل أعوذ برب الناس .. (أحمد بيجري فـ الشقة والكائن ده بيجري وراه لحد ما وصلوا لآخر حيطه .. بيزنقه فـ الحيطة.. العرق فـ كل مكان .. من الخوف شعره اتحول أبيض .. قلبه بيدق .. بيدق بأقصى سرعه .. بيغمض عينيه .. بيتخيل أبشع المشاهد دموية .. بيحاول يفتكر الشهادتين .. بيفكر فـ ريهام سعيد .. بينساها .. بيفتكرها تاني .. ناس بتنزل تحت الارض وبتطلع .. ريهام سعيد طلعت عندها حق .. ايوة سماح ايوة .. بيفتكرها .. لحد ما قرب منه وبقيت عينيهم فـ عين بعض)
- انت عارف انا هعمل فيك ايه ؟
*النور رجع*
أحمد : هوا انت ؟؟ يا ابن الـ .....،
*بيجري وراه وهوا بيعيط وبيرزعه العلقة التمام على المقلب ده.. انا شايفه حالا بيعمل فـ أخوه فينيش لـ راندي اورتن .. انا مش شايف رقبة أخوة ابراهيم أساسا .. البقاء لله*
............................................................
‫#‏قصة_لـ_مهند_الفخراني‬
...............................................................
*ايمان فـ التاكسي بعد ما وصلت ريم *
ايمان : شكرا
- العفو يا استاذة
ايمان : اتفضل
- لا عاوز كمان خمسه جنيه .
ايمان : ليه ان شاء الله ؟ معروفة المسافة دي بعشرة جنيه .. انت مش مشغل العداد عشان كده بقى .. هما العشرة جنيه مش هيزيدوا.
- انا مش مسامح
ايمان : متسامحش يا اخويا .. انت فاكرني من البنات اياهم ولا ايه ؟
*بتقفل الباب بقوة والسواق اتفجع وبيبرطم .. اما ايمان فابتسمت ابتسامة المنتصر *
.....
*الشمس طلعت ونورها واصل للمدى .. عدى شعاعها كل الغيوم والسحاب .. والشتا خد جنب وعمل ألف حساب .. الشمس ويا الشتا تديك شعور بالدفا .. ونظرة الابتسامة اللي ماليها الرضا*
أم مهند : حلوة دي نزلها كلها ؟
مهند : ع البركة
أم مهند : عملتلك لايك
مهند : هههههههه أصلا مش محتاج
أم مهند : الله يرحم ما كان عندك تلاتة بيقرولك منهم انا ..
مهند (محرجا): لازم تفكريني ؟؟ .. ليه كل الامهات كده ؟ ربنا يسامحك
أم مهند : عشان متنساش بس
مهند : نسيت نسيت
أم مهند : خلاص هفكرك بكرة
مهند : طيب انا هعملك أن فريند ونخلص بقى
أم مهند : والله لو عملتها لأقول لابوك
مهند (مظهرا عدم الخوف) : ربي عيالك ربي عيالك .. انا نازل بقى
أم مهند : خد كيس الزبالة معاك..
مهند : حاضر
أم مهند : وكلمني وانت راجع عشان لو عاوزة حاجة
مهند : حاضر
أم مهند : وعدي على الترزي هات جاكيت البدلة بتاع اخوك
مهند : حاضر
أم مهند : بس
مهند : حاضر
أم مهند : انت اهبل ؟
مهند : حاضر ..
...
‫#‏الصبح‬
*الصبح رحمة لكل حد خايف .. بيديك روح جديدة تكمل بيها ..وبيساعدك تتخطى أحزانك ..و بينور قلبك .....
أم ريم : يلا يا ريم هنتأخر
ريم : حاضر هكتب حاجة بس " و بينور قلبك من تاني *" .... يلا يا ماما
.....
*عربية الفول*
أحمد: انا هروح الكورس ده مخصوص عشان أكلم بنات أجانب فـ الشات وأسافر .. عاوزين نقب على وش الدنيا .
مهند : طيب ناولني عيش من عندك ..
....
*أمام قبر المرحوم عبد الله*
ريم : بابا حبيبي .. وحشتني .. بجد مش عارفة أعيش من بعدك .. الدنيا وحشة أوي يا بابا .. نفسي أجيلك .. عارفة انك بتقول بعد الشر .. بس أحب أقولك ان الشر هنا مش عندك .. وحشني هزارك معايا .. غيرتك عليا .. حضنك ..وحشتني كلمة ريم منك ...
أم ريم : يلا يا حبيبتي هتتأخري على الكورس بتاعك ..
ريم : حاضر
......
*كورس الانجلش *
انستراكتور معتز : اعرفكم بنفسي انا مستر معتز .. احب اتعرف بيكم .. من اليمين كده ..
*- مها – ولاء – عماد – ريم – ايمان – احمد – مهند *
- اهلا بيكم.. اتمنى ان الكل يشترك فـ جروب بتاع الاكاديمي ع الفيس انهارده .. .. فـ البداية هنبدأ بـ كونفرسيشن ..................
..........................
وإلى لقاء آخر نكمل فيه الحكاية ..

• 

•