ريم ومهند الحدوتة السادسة

الحدوتة السادسة ...،
" ريم ومهند "
.....................
* احساسك بإنك هتقابل شخص مهم عندك .. بيخليك طاير .. بيخليك مش حاسس بالدنيا ولا الناس ..بتفكر بس فـ اليوم ده ..صاحي بدري بتدور بعناية على كل حاجة هتظهر بيها قدامه .. يا ترى ألبس ده ولا ده؟؟ اه ده حلو .. لا مش هيعجبه هوا بيحب الاسود .. لا مش كل مرة .. طب أحلق دقني ولا أخففها .. طب هيا بتحب الكلاسيك ولا الكاجوال .. انت مش انت وانت معجب بحد *
....................
*قبل الكورس بربع ساعة*
( مهند وصل لقى ريم وايمان وأحمد)
مهند : السلام عليكم
- في صوت مجمع (وعليكم السلام)
مهند : ايه يا بني مش عارف أوصلك ؟ اتصلت بيك فـ البيت .. أمك قالتلي نزل ..
أحمد (بيغمزله وبيتكلم من تحت ضرسه) : الموضوع كبير بعدين .. ايمان قاعدة..
مهند : إزيك يا ايمان
ايمان : الحمد لله .. انت عامل ايه
مهند (باصص لريم) : انا الحمد لله يا ايمان .. المهم انتى يا ايمان .. واخده بالك يا ايمان ؟..
إيمان (بتبص لريم وبتخبطها كوع خفيف) : أه واخده بالي
مهند: طب الحمد لله
ريم (وشها جاب خمس ألوان مختلفة) : ازيك يا مهند
مهند : أحلى كلمة مهند أنا سمعتها بقالي عشرين سنة .. بتقوليلي انا إزيك؟ .. أنا حالا بقيت كويس ..أنا ..
ريم (بتنهار من الكسوف) : مهند بس اسكت خالص
مهند (بيبصلها بصة إعجاب ) : حاضر
إيمان (بتلحنها): تيرارارا
*بيضحكوا جميعا.. ريم بتتكسف من أقل نظرة وأقل كلمه وأقل همسة وأقل أقل ما يتعلق بالمشاعر .. عارفين لما حد يبقى دافن مشاعره فـ بير غويط .. أو قافل عليها باب حديد .. و رمى المفتاح فـ نفس ذات البير ؟ .. هيا دي ريم*
* مهند أصبح في ذروة الإعجاب .. اللي مكانش بيبص فـ وش بنت .. بقى بيركز في التفاصيل .. اللي كان بيتناسى وجود قلب فـ قفصه الصدري .. دلوقتى بيقول كلام حلو .. هذا الساكت دائما .. لم يستطع منع لسانه عن البوح .. هوا ده مهند..*
*بعد نهاية الكورس مهند وأحمد كل واحد فيهم وصل فتاته*
أحمد : أي خدمة جاي أوصلك أهو
إيمان: متشكرة بجد لذوقك
أحمد: لا لا أنا موجود لو احتجتي حد يوصلك دايما
إيمان : ربنا يخليك ..
أحمد : تاخدي شوية لب ؟
إيمان: هات
أحمد (ضاحكا): ولا بلاش .. هما آخر شوية
أيمان : هههههههههههه
أحمد : فاضل اربعة بس .. يلا انتي اتنين وانا اتنين
إيمان ( متغاظة جدا ): لا خليهملك يا خفيف
أحمد : ليه بس ؟ يلا على راحتك
إيمان : كفي نفسك
أحمد : ماشي .. خلى بالك انت بس على نفسويتك
إيمان : ماشي
(ركبت التاكسي)
أحمد (بعد ما أكل اللب): مع السلامة..هكلمك ع الفيس .
إيمان : ماشي هستناك
...
مهند : ثانية واحده هجيب حاجة
ريم : أوكي
(بيدخل المحل بسرعه جدا وبيطلع)
مهند : اتفضلي
ريم : الله شوكلاتة؟
مهند : اممممم
ريم : مش هقدر أقول لا يا مهند.. أصلا مش هقدر أقاوم .
مهند (ناظرا لطفولتها) : انتي بنتي
ريم : ليه انا ؟
مهند : أجمل علاقة فـ الدنيا هيا علاقة البنت بأبوها .. أبوها بيبقى فارس أحلامها الأول .. بطلها الأول .. فبيبقى له علامة جامدة فـ حياتها .. ومهما كان قاسي عليها هتفضل تحبه .. والبنت فـ حياة أبوها هيا الطفولة والبراءة والحنان ....
( ريم بتبص لـ مهند بإعجاب وهوا بيكمل )
جميل ان يبقى عندك فـ البيت ملاك صغير على هيئة بنت .. أنا نفسي أخلف بنت ونبقى صحاب .. نخرج سوا ناكل سوا نلعب سوا .. بحب فيلم عادل إمام اللي هوا كان طالع فيه أبو "حلا شيحة .. أه اسمه عريس من جهة أمنية .. عارفاه؟
ريم : اممم
مهند : انا مظنش اني هقبل حد ياخدها مني ويتجوزها .. هيبقى صعب عليا اني اتحمل ده .. تسمحيلي أكون الأب ده ؟
ريم : انت مجنون .
مهند : أنا مجنون ؟
ريم : آه بقى
مهند : طب مفيش شوكلاتة بقى
ريم (بتبعد الشوكلاتة عن ايده): ههههههه لا لا خلاص خلاص.. انت جميييل
مهند : انتي ضعيفة أوي قدام الشوكلاتة كده؟
ريم : امممم دي حياتي أصلا
مهند : أصلا ؟
ريم : اممم أصلا .. عندك اعتراض؟
مهند : لا
ريم : بحسب
مهند : كملي
ريم : آه يابني انا مدمنة .. مستعدة أعمل أي حاجة عشان الشوكلاتة
مهند (ابتسامة شريرة وبيغمزلها) : أي حاجة أي حاجة ؟
ريم (بتتكسف وبتخبطه فـ كتفه) : انت شرير
مهند : حاضر
ريم (عينيها بتلمع) : مهند انت طيب أوي
مهند (ضاحكا): الإتنين ؟
ريم : آه .. لا لا ساعات وساعات
مهند : أنا معاكي ببقى على طبيعتي يا ريم
ريم (مبتسمة ومكسوفة) : طب ليه أنا ؟
مهند : عاوزة ايه يا شقية انتي؟
ريم : اشمعنى انا ؟
مهند : بعدين هقولك
ريم: حاضر
مهند : حاضر يا (إيه)
ريم : حاضر يا بابتي
مهند (بيشاور لتاكسي ويفتحلها الباب) : اتفضلي يا أميرتي
ريم ( وهوا بيقفل الباب بتبصله على قد ما تقدر وكأنها بتحفظ ملامحه)
مهند : هطمن عليكي أول ما تروحي
ريم : ماشي يا مجنون
....
* مهند دخل البيت لقى الحاجة بتتفرج على قناة سي بي سي وبتكتب بحماس .. بتكتب باهتمام فظيع لدرجة انها مهتمتش إنه رجع من بره .. مهتمة جدا باللي بتعمله .. وبتطبق كل اللي بتتعمله فـ قنوات الطبخ دي ما شاء الله *
مهند : ها عملالنا أكل إيه ؟
أم مهند : هششش مش عاوزة صوت .. أنا مركزة
( وبكده تبقى ديه نهاية حلقتنا من برنامج الشيف الشربيني )
مهند : كان بيعمل ايه ؟
أم مهند : السويسرول
مهند : الله دي حاجة شكلها جامدة ؟
أم مهند : اه طبعا .. هوا انا بكتب أي حاجة ؟
مهند : آه ما انا عارف .. عملالنا أكل ايه بقى ؟
أم مهند : مفاجأة
مهند : أيوة بقى .. مستنيها من فترة
أم مهند : أي خدمة مع انك متستاهلش
مهند : طب تقولي انتي ولا أقول أنا ؟
أم مهند : قول يا حبيبي
مهند : رقاق باللحمة المفرومة
أم مهند : لا
مهند : مكرونة بشاميل
أم مهند: لا
مهند : اممم يبقى فراخ محشية رز وحاجات
أم مهند : انت مالك بقيت خايب كده ليه؟
مهند : طب غلب حماري .. قولي انتي يا غالية
أم مهند : صينية بطاطس
مهند (مصدوما) : بطاطس ؟
أم مهند : مالها البطاطس يا موكوس ؟
مهند : جميلة .. استني اتحزم وأرقص
أم مهند : عوض عليا عوض الصابرين يارب
مهند : يعنى عشر ساعات يوميا على أم القناة دي وفـ الاخر كوسة وبطاطس ؟
أم مهند : انت هتتبتر؟ طب يا جزمة بكرة عدس .. ايه رأيك ؟
مهند (مقهورا): أنا في قمة سعادتي ..
أم مهند (منتصرة): أيوة كده يا جزمة
.....
إيمان : اتأخرت عليا ليه
أحمد: مفيش على ما اتغديت واتفرجت ع الماتش
إيمان : انت قايلي هتكلمني أول ما تروح
أحمد : معلش بقى أصل مانشستر كان بيلاعب ريال مدريد
إيمان : يعني الماتش اهم ولا انا ؟
أحمد : انتي عبيطة صح ؟
إيمان : جاوب
أحمد : الماتش طبعا يا روحي
إيمان : قديمة
أحمد : نلمعوها تبقى جديده
إيمان : ده انت رخم رخامه .. بس بعزك
أحمد : عارف عارف
إيمان : ههههههههه انت في حد فـ عيلتكوا أهبل ؟
أحمد : آه جوز خالتي
إيمان : طيب يا خفيف
أحمد : هاتي رقمك عشان أكلمك معايا رصيد
إيمان : ماشي .. بس ايه الكرم ده؟
أحمد : دي أقل حاجة عندي
إيمان : والله شكلها دقايق مجانية
أحمد: ههههه عرفتي منين.. أمال هكلمك من جيبي؟
إيمان : هههههههه ده انت بيئة
....
أم ريم : مالك حبيبتي اليومين دول بتقعدي لوحدك .. في حاجة مزعلاكي ؟
ريم : لا يا ماما والله .. بالعكس انا مبسوطة
أم ريم : والمذاكرة والكلية ؟
ريم : الحمد لله يا ماما كله تمام
أم ريم : اسمه ايه بقى ؟
ريم: هوا مين ؟
أم ريم : اللي شغل بالك كده؟ هتخبي على ماما ؟
ريم : لما يبقى في حاجة متأكدة منها هقولك علطول يا ماما
أم ريم : طيب انا واثقة فيكي .. انا ربيتك كويس وعارفه انك مش هتخذليني.. خلي بالك على نفسك أوي يا ريم..
ريم : متخافيش عليا يا ماما .. انا عمري ما هخذلك
.....
* انهارده آخر يوم فـ السنة .. سنة غريبة .. مش هينفع نصنفها .. هتلاقي نفسك فارقت فيها ناس كانوا أقرب ما ليك .. وعرفت فيها ناس بقوا أقرب ما ليك .. حصلتلك مواقف كتيرة عرفتك نفسك كويس .. وعرفتك اللي حواليك .. لما الشمس تغرب بكرة هنبتدي سنة جديدة بحلوها ومرها .. اتمنى تكون شريكي فـ صنع لحظات جميلة فـ السنة دي*

• 

•