ريم ومهند الحدوتة السابعة

الحدوتة السابعة ....،
‫#‏ريم_مهند‬
.................................
* بكره آخر يوم فـ السنة .. سنة غريبة .. مش هينفع نصنفها .. هتلاقي نفسك فارقت فيها ناس كانوا أقرب ما ليك .. وعرفت فيها ناس بقوا أقرب ما ليك .. حصلتلك مواقف كتيرة عرفتك نفسك كويس .. وعرفتك اللي حواليك .. لما الشمس تغرب بكرة هنبتدي سنة جديدة بحلوها ومرها .. اتمنى تكون شريكي فـ صنع لحظات جميلة فـ السنة دي *
........
* على فيس بوك *
مهند : ايمان ازيك
ايمان : اهلا اهلا يا مهند
مهند : أخبارك ايه
ايمان : الحمد لله
مهند : إوعي يكون أحمد مزعلك فـ حاجة
إيمان: وهوا يقدر ؟ ده انا أنفخه
مهند : هههههههه لا متنسيش انه صاحبي
إيمان : متقلقش .. أحمد حد كويس
مهند : آه والله ابن حلال فعلا وطيب
إيمان : وريم ؟
مهند : ريم .. دي ملاك .. صحيح .. هبقى اكلمك بكره اشوفكوا فين؟ بس ده سر .
إيمان : قشطة
مهند : انا شكلي هحتاجك الفترة الجاية كتير
إيمان : احنا فـ الخدمة يا باشا
....
*قبر المرحوم عبد الله*
بكرة آخر يوم فـ السنة دي يا بابا.. السنة دي كانت صعبة أوي عليا .. فقدتك فـ أولها يا بابا يا أعز حد عندي .. كنت دايما قريب مني وحنين عليا .. فاكره ابتسامتك لما كنت بعمل حاجة صح .. حتى لما كنت بغلط .. كنت براحة بتفهمني غلطي .. حتى لو اتعصبت كنت بتيجي تصالحني .. بابا ليك بهدي كل حاجة حلوة فـ حياتي لإنك كل حياتي .. السنة دي إنت بطلها يا حبيبي .. هحاول دايما أحافظ على اللي علمتهولي .. وجايالك انهارده عشان أكلمك عن مهند .. بابا أنا مش هخبي عليك .. انت علمتني الصراحة .. مهند بسرعة بقى حد قريب مني وفاهمني .. ده حتى بيقولي يا بنتي .. هوا هيتخرج السنادي يا بابا .. أنا واثقة فيه جدا .. هوا شبهك أوي .. عارفه إنك بتقول إن مفيش حد شبهك .. أقصد فيه منك يا بابا .. هوا انت فيه حد زيك يا قمر ؟ ..أنا حكيتلك قبل ماما أهوعشان متزعلش .. ربنا يرحمك يا بابا .. جيبتلك الورد اللي بتحبه ....
....
* لما هتحب هتحس إن كلام الحب معمول أصلا عشان حبيبك .. وهتستغرب إن في ناس بتحب أصلا على الكوكب ده .. هتقول مش ممكن يبقوا زينا .. لما هتحب .. هتحس الدنيا جميلة .. هتحب نفسك والناس .. لما هتحب .. مش هتاكل ولا هتشرب من كتر التفكير .. هيبقى كلامك مع حبيبك هوا الدوا وهوا الزاد .. هتلاقي نفسك خسيت .. يعني رجيم ذاتي . لما هتحب .. مش هتنسى أي كلمة اتقالت منه وكإنها كلمات مأثورة .. ولا هتنسى أي فعل منه ولا صوت ضحكته .. متستغربش .. أصل الحب بيقوي الذاكرة.. لما هتحب .. مش هتنسى ريحة حضنه حتى لو ملمسكش .. لما هتحب .. هتحس نفسك فـ عالم كرتون طيب و بريء .. صدقني .. لما هتحب هتعيش *
....
*على فيس بوك*
مهند : عاوز أسلم عليكي حالا
ريم: الله يسلمك يا مهند
مهند : لا .. أسلم عليكي بالإيد
ريم : ازاي يعني ؟ .. انا بيني وبينك ساعة
مهند : يعني مفيش حل ؟
ريم : لا طبعا .. انت هتخترع في دي كمان ؟
مهند : طيب يا ريم لقيتها لقيتها
ريم : هيا إيه اللي لقيتها يا مهند ؟
مهند : حطي ايدك على صفحة الشات اللي بيننا
ريم : ليه يعني ؟ مش فاهمة
مهند : حطيها بس لمدة خمس ثواني
ريم : أهو .. حطيتها
مهند (بيحط ايده أيضا على الشاشة وبعد خمس ثواني) : شكرا يا ريم
ريم : خد هنا .. فهمني
مهند : مفيش يا بنتي .. كنت عاوز أسلم عليكي بالإيد .. وسلمت
ريم :انت مجنون ..
*الجنون مع حد قريب منك بيبقى طبيعي جدا ومنطقي أيضا ليك.. لكن بالنسبة للناس لا طبعا .. ما اهو لما تضحك بكل ما فيك اكيد هتبقى مش طبيعي .. لما تعيط بكل ذرة فيك أكيد برضو مش هتبقى طبيعي .. لما تتخانق معاه الدنيا تبقى سودة .. ولما تتصالحوا الشمس تطلع ..ده كله مش طبيعي ..انك تتخيل حبيبك قدامك بيكلمك .. وتدير معاه .. في خيالك .. حوار رومانسي كوميدي يتخلله ابتسامه حزن ودمعة فرح ..دي فـ حد ذاتها قدرات خاصة مش هتقدر توصلها إلا إذا أصابك عشق .. يا صديقي .. الجنون صديق وفي للحب ..*
...
أحمد : أمال مين بيطبخ ؟
إيمان : أختي وأنا
أحمد: ربنا يقويكوا
إيمان : من بعد ما ماما اتوفت ربنا يرحمها ..كانت شايله همنا والله
أحمد: ربنا يرحمها
إيمان : يارب .. عارف يا أحمد ..
أحمد: ها
إيمان : أنا عمري ما كنت جامدة كده فـ التعامل مع الناس .. من يوم ما ماما اتوفت وأنا بقيت الكبيرة .. ماما .. كانت شايلانا .. كنا نحكيلها همومنا العبيطة وتطبطب علينا وعمرها ما حسستنا اننا بنفكر بتفاهة .. عارف .. ماما كانت بتعملنا كل حاجة فـ البيت وعمرنا ما حسينا بقيمتها .. كانت طيبة أوي .. وضحكتها كانت صافية أوي .. بيقولوا اني شبهها .. بس لا .. هيا أحلى بكتير .. عارف بابا حزن عليها قد ايه ؟ انا مكنتش متصورة إنه كان بيحبها كده .. أصل ساعات الحب مش بيبقى كلام وبس*
أحمد : يااه كل ده فـ قلبك .. انا اسف
إيمان (بتمسح دموعها ): ليه ؟
أحمد: زعلتك بسؤالي
إيمان : لالا متاخدش فـ بالك يا احمد . انا كويسة
أحمد : طيب هقولك نكته
إيمان (بابتسامة): قول
أحمد : واحد قاعد مع خطيبته عندها فـ البيت
إيمان : أه
أحمد : ف النور قطع .. قالتله خد فرصتك يا حبيبي .. راح سرق الشنطة وهرب
إيمان : هههههههههههههههههههههه
أحمد : أموت انا واعيد السنة
إيمان : والله ضحكتني ..انت مسخرة
احمد: وانتي عسل
....
* فـ أوضة مهند حيث كان نائماً *
أم مهند صحيت بدري وبتنضف الشقة ودخلت الاوضة بتاعة مهند .. فتحت الشباك فالشمس دخلت الاوضة ..
مهند (فاتح عين وقافل عين) : ايه ده ؟ ليه كده ؟
أم مهند : خلي الشمس تدخل الاوضة
مهند : طيب الهوا ده
أم مهند : معلش عشان يجدد الهوا فـ الاوضة
مهند (بيحاول ينام مجددا ): يارب صبرني
(بعد خمس دقائق)
أم مهند بتدخل الاوضة تكنسها بالمكنسة ..
مهند ( مستنجدا ) : ايه تاني ؟
أم مهند : الشقة عاوزة تنضيف ..
مهند (بيغطي وشه بالمخدة ): ماشي
(بعد عشر دقايق)
أم مهند بتفتكر الملايات وانهارده ميعاد الغسيل .. وبتشد الملايه من تحت مهند وهوا نايم
مهند : إيه ؟
أم مهند : إوعى كده عاوزة الملاية
مهند (بيقوم من السريروهوا بينفخ): هوا الواحد ميعرفش ينام فـ البيت ده
أم مهند : ماله ده ؟ حد جه جنبه ؟
....
*إدارة المعهد البريطاني*
عماد (طالب فـ الكورس) : حضرتك أنا عاوز رقم تليفون البيت بس
السكرتيرة : حضرتك دي أسرار مينفعش أطلعها
عماد : ليه بس ؟ أنا عاوز رقم تليفون بيتها عشان أخطبها .. مش اكتر
السكرتيرة :حضرتك دي مش من صلاحياتي
عماد : طب أنا هدخل للمدير وأقوله ..
(عند المدير)
المدير : طيب ما تاخد رقم التليفون منها حضرتك
عماد : عاوز اعملها مفاجأه ليها
المدير : طيب
....
*ليلة راس السنة *
الليلة دي غير كل الليالي .. الليل أصلا مرتبط بالحب ارتباط وثيق .. الليل هوا كلمة السر .. هوا الملخص لكل أحداث الحب .. هوا الروح اللي هتكملوا بيها .. فما بالك لو ليلة أول يوم فـ السنة *
ريم: بتكلمي مين ؟
إيمان : ده أخويا ثواني .. (بتبعد عن ريم وبتتكلم بصوت واطي) ايوة يا مهند انت واحمد فين؟
مهند : احنا قريب منكم
إيمان : هطير أنا
(تعود لريم )
إيمان : عجبني أوي استايل فستانك يا ريم .. بقولك ايه ؟ أنا هبص على حاجة فـ المحل ده وراجعالك
ريم : مش مرتحالك .. مالك ؟
ايمان : مفيش استنيني
ريم : ماشي
(في هذه الاثناء يظهر مهند ومعاه بوكية ورد أحمر ولابس بدلة سوداء )
ريم (بتحط ايدها على بؤها وبتصرخ): ايه ده ؟
مهند : اتفضلي
ريم :الله .. حلو أوي.. عرفت منين اني بحب الورد؟
مهند : أنا جاي أوعدك إني مش هبعد عنك ..
ريم : لا مش ممكن ..انا بحلم ولا ايه ؟ انت بجد هنا ؟ (بتبص حواليها)
بيمسك ايدها اليمين ويبوسها وهيا ايدها الشمال ماسكة الورد وبتحاول تستوعب اللي بيحصل.. مهند بيطلع رسالة من ورق شبه البردي وبينحني ويقدمها لريم وبيقول : اتفضلي يا مولاتي
ريم (بتمسك الرسالة وبتفك الشريط بتاعها وبتقراها وهيا بتبكي) .. *ريم يا ملاكِ البريء .. انتي فتاة أحلامي .. انتي اختصار لكل أميرات العصر القديم .. وملكات جمال العصر الحديث *
ريم دموعها غطت وشها .. هتحتاج وقت عشان تستوعب اللي بيحصل معاها ..
.......................

• 

•