ريم ومهند الحدوتة الخامسة عشر

الحدوتة الخامسة عشر ...،
‫#‏ريم_مهند‬
................................
النهار .. فـ وسط فنون الشر .. وغدر البشر .. وضلمة القلوب .. بتظهر طاقة نور .. مع آذان الفجر .. يوم جديد .. يغير هيأتك .. ويلهمك القرار .. النهار.. روح موصولة بيك .. بريد مستعجل .. جاي مخصوص ليك .. النهار .. هو بداية اللا نهاية ونهاية اللا بداية .....
..........
*من أجمل الحاجات الجميلة فـ الدنيا إنك تصحى على صوت حد بتحبه .. أو إنك تصحيه من النوم .. بغض النظر عن إنه ممكن يشتمك كل الشتايم الفظيعة عشان صحيته من أحلى نومه.. إلا إنك هتحس إنك قريب جدا ليه .. هتبقى مستمتع بصوته على غير العادة .. جميل إنك تسمع طفل أول ما بيتكلم .. أوحبيبك أول ما بيصحى .. دي من الحاجات المبهجة القليلة فـ الحياة*
.....
‫#‏ريم‬ و ‫#‏مهند‬
مهند : صباح الخير يا بريئة
ريم (بصوت رقيق) : صباح الخير .. هيا الساعة كام ؟
مهند: عشرة ونص.. يلا قومي
ريم: لا سيبني نايمة شوية يا مهند
مهند : ناقص تقوليلي إحكيلي حدوتة عشان أكمل نوم
ريم : أيوة أيوة .. إحكي بقى
مهند : أقولك قومي ؟ تقوليلي لا . وكمان أساعدك إنك تنامي بحدوتة
ريم : عشان خاطري
مهند : حاضر .. كان مرة في بنت رخمة وهبلة وعبيطة اسمها ريم
ريم : اممم
مهند : بس بقى .. حبت واحد اسمه مهند طيب وجدع وأمور وشهم وابن حلال ووو
ريم (بتضحك)
مهند : يلا قومي
ريم: كمل الحدوتة
مهند: يادي الحدوتة .. مهند الطيب حب ريم الشريرة ولبس البدلة السودة وهيا لبست فستان أبيض وفضلوا يتنططوا فـ الشارع تحت المطر ....
ريم : ياااه حلو ده ..
.......
‫#‏أحمد‬
(بقالهم فترة بيقولوله يا جاهل ..وبيتريقوا على اللغة بتاعته ..فقال لازم أتعلم عربي كويس .. أنا مش أقل من أي حد .. جاب أفلام دينية قديمة عشان يتعلم .. وقرر يتكلم باللغة العربية الفصحى في جميع معاملاته .. قرر ميبقاش جاهل تاني .. الخطوة الأولى في أي لغة هيا إني أبدأ أتكلم بيها فـ كل حتة .. يارب نفسي مبقاش جاهل ... بيكرر الجمل المأثورة عشان يتعلم بسرعة..
شُلت يدي .. لا إنها سليمة
تبا لك..ألهذا جمعتنا
وماتت رابعة ..
ثم تأتيه مكالمة مهمة ...
.......
#مهند و #ريم
مهند : طب يلا يا هانم قومي حضريلي فطار
ريم: لا عاوزة أنام شوية كمان ..
مهند: يعني هتسيبيني أنزل كده ؟ مفيش أي إحساس بالمسئولية ؟
ريم : عاوزة أنام يا نيمو
مهند : نيمو دي بتحسسني إني فـ مسلسل كرتون وبلاقيني بريء جدا بعدها .. أهو عشان نيمو دي .. أحضر أنا الفطار ويجيلك فـ السرير يا ملاك انت..
ريم : طيب متنساش الكورن فليكس
.....
‫#‏ألبوم_صور‬
(أول ما إبراهيم صحى من النوم فتح ألبوم الصور اللي جمعته بيها فـ الخطوبة .. صورتها وهيا بصه ناحيته وصورته وهوا بيضحك فـ وجودها ..كانت جميلة .. لحظات سعيدة.. بس يا خسارة .. مفيش نصيب .. برغم اللي وصلناله إلا إني عاذرها جدا .. أصل بسنت بتحب الاكتمال فـ كل حاجة .. مش بس فـالجواز عشان مظلمهاش .. حتى لما بتشتري حاجة بتبقى بتدور قبلها شهرين .. هيا طبيعتها كده .. ربنا يكرمها بقى بعدي .. مرضي ده اختبار من ربنا عشان يعرفني حقيقة المشاعر اللي حواليا .. شكرا يارب)
.....
#ريم
مهند : تعرفي إن صوتك أحلى وانتي صاحية من النوم
ريم : يا سلام؟
مهند: آه والله ..أنا كده مضطر أصحيكي دايما .. لازم أسمع صوتك ده كل يوم ..
ريم: طب إفرض أنا صحيت قبل ما انت تصحيني ؟
مهند: مليش دعوة .. تنامي تاني .. صوتك وانتي لسة صاحية يجنن
ريم : وصوتي لما بكون فايقة.. وحش ؟
مهند: جدا .. معندكيش فكرة
ريم (بحزن) : كده ؟
مهند(ضاحكا) : إنتي مستحملة نفسك إزاي كده ؟
ريم : للدراجادي وحش ؟
مهند : قصدك للدراجادي حلو.. انتي صوتك رقيق لدرجة إني لما بسمعه ببقى مش هنا .. بحس إني فـ حلم جميل .. صوت مبهج كده .. وكإنك طفلة عندها أربع سنين وفرحانة بالكلام .. لو كان عمر خيرت سمعك أكيد كان استخدم صوتك بـدل الكمان .. انتي كلك على بعضك لحن جميل
.......
‫#‏إيمان_أحمد‬
إيمان : صباحوعنب يا مودي
أحمد : صباحُك يضحَكُ
إيمان : إيه "صباحُك يضحَكُ " دي يا ابني ؟
أحمد: دي زي صباحك بيضحك .. بس بالفصحى
إيمان :آه قولتلي ..وعامل إيه ؟
أحمد: إني بخير يا عزيزتي
إيمان : إنت سخن يا بني ؟
أحمد: إطلاقا .. أنا في خير حال
إيمان : مالك ؟ إنت ضارب إيه ؟
أحمد: كل ما هنالك أنه صباح شريف .. هل لي أن أستأذن بعض الوقت
إيمان : اتفضل (في سرها يابن المجنونة)
(بعد خمس دقايق)
أحمد: لقد عدت للتو يا حبيبتي
إيمان : وأين كنت يا مهجة القلب ؟
أحمد : كنت ألبي نداء الطبيعة ..
إيمان : شكرا روح لأمك
......
‫#‏بسنت‬
(بسنت صحيت من النوم قدامها أهم قرار هتاخده فـ السنة دي .. مش عارفة إذا كانت صح ولا غلط .. كل اللي هيا عارفاه إنها مش مبسوطة مع إبراهيم .. مش مبسوطة لأسباب كتير .. ما اهو إبراهيم مكانش غني ولا عنده عربية ولا شقة يعني .. وكمان مريض .. لا كده كتير .. وبعدين هيا الخطوبة اتعملت عشان كده .. لو ما حسيناش بالاتفاق كل واحد يروح لحاله .. مظنش إني غلطانة .. نبعد دلوقتي أحسن من بعدين )
.....
ريم : أنا فيا كل ده ؟
مهند: أنا ياريتني بعرف أوصفك .. إنتي يا ريم نهاية الوصف .. سقف الطموح .. فتاة الحلم ..
ريم (ضاحكة) : أنا ؟
مهند : طب عارفة لما بتضحكي ؟
ريم : آه
مهند : و عينيكي بتقفل شوية كده
ريم : آه
مهند : ومناخيرك تكرمش كده
ريم : أيوة
مهند : أهو أنا أبيع هدومي وأشوف ضحكتك دي
.....
‫#‏أحمد_وأمه‬
أم أحمد : أحضرلك فطار يا زفت
أحمد : عمتي صباحا يا أمي
أم أحمد : بتقول إيه ؟
أحمد: هل لي أن أساعدك في إنجاز بعض المهمات المنزلية ؟
أم أحمد : مالك يا وله ؟
أحمد : أنا أتجاذب معكِ أطراف الحديث يا أماه
(بتنادي إبراهيم ولسه هتصوت )
أحمد : ماذا دهاكما .. أنا بخير
إبراهيم : إنت بتتكلم كده ليه يا أهبل انت ؟
أحمد : تبا لك ..لا تسبّني وإلا قطعتك إربا .. أغرب عن وجهي
(إبراهيم وأمه بيبصوا لبعض وبيقولوا أكيد الواد الجاهل ده اتجنن)
......
‫#‏ف_بيت_بسنت‬
والد بسنت : خلاص يا بنتي ده قرارك النهائي
بسنت: أيوة يا بابا .. ده موضوع وانتهى
أم بسنت : أنا مش عارفة ليه عملتي كده .. الولد كويس وبيحبك
بسنت :خلاص انتهينا .. ده موضوع قديم ..
والد بسنت : يا بنتي كلميه وخدي مهلة تانية قبل ما ينزل من بيته
بسنت : لا يا بابا .. كده أحسن .. خليني أركز فـ مستقبلي
أم بسنت : مستقبلك ؟
بسنت : أيوة.. أنا لازم معملش حاجة غصب عني لا جواز ولا دراسة .. لازم أبقى مبسوطة
والد بسنت : مش ده إبراهيم إللي جيتي تعيطيلي عشان أقبله ؟
بسنت : بابا ماما .. إنسوا بقى إبراهيم .. ده موضوع واتقفل
.......
‫#‏انترفيو‬
ريم : رايح فين فـ الشتا ده ؟
مهند : رايح إنترفيو
ريم : إنترفيو إيه ؟
مهند : إنترفيو شغل ؟
ريم : شغل إيه ؟
مهند: أمن فـ فتح الله من بالليل للصبح
ريم : بس هيبقى تعب عليك
مهند : دبلتك لازم تبقى من جيبي يا هانم
ريم : طب هتعرف توفق بين الشغل والكلية ؟
مهند : الشغل كام ساعة بالليل والكلية الصبح .. متقلقيش
ريم : طب كنت استنى لحد ما تخلص التيرم ده ؟
مهند : لا يا حبي .. معندناش وقت نضيعه .. لازم أبدأ أحوش
ريم : ربنا يخليك ليا
مهند : قومي بقى واعملي حسابك هنتقابل كمان ساعتين تلاتة
ريم : ماشي أنا قايمة أهو
مهند : آه على ما تقفي قدام المراية وتلبسي الطرحة وتقلعي الطرحة وترجعي تلبسيها ووو
ريم : هههههههههه لالا أنا مش باخد أكتر من ساعة قدام المراية
.....
‫#‏أول_الكوبري‬
*فـ الميكروباص*
أحمد: كم من المال يكفيك لتوصلني إلى أول الكوبري ؟
- تحت أمرك يا استاذ
أحمد : كم من المال يكفيك ؟
- طب ليه الغلط ع الصبح ؟
أحمد: كم تريد ؟
- اللهم طولك يا روح
أحمد : أنا لا أفهم ماذا فعلت لك كي تتملكك العصبية ؟
- إنزل ومش عاوز أجرة بدل ما آجي أفرمك يا جاهل يا ابن الـ ..
(برضو جاهل .. حتى انت يا سواق يا فاشل .. أنا فشلت حتى إني أتكلم لغة عربية فصحى ..مفيش قدامي غير الانجليزي)
......
*فتح الله ماركت*
مدير شئون العاملين : مليت الابلكيشن
مهند : مليته حضرتك
مدير شئون العاملين : طيب عموما إحنا بنقبل ناس بتدرس .. بس المهم الجدية والالتزام .. لو في نصيب هيبقى أول الشهر .. هنكلمك
مهند : شكرا حضرتك
مدير شئون العاملين : ربنا يوفقك وتبقى معانا
.....
*فـ بيت بسنت*
بسنت : دي شبكتك يا ابراهيم .
إبراهيم : آه دي شبكتي فعلا
بسنت: ودي كمان الهدايا اللي انت جيبتهالي
إبراهيم : وبعدين
بسنت : أنا عاوزاك تفهمني .. إحنا ..
إبراهيم (مقاطعا) : وفري كلامك ده .. الهدايا مش عاوزها .. أما الشبكة دي انتي متستحقيهاش ..
(أخد الشبكة وفتح الباب ومشى)
.....
‫#‏أميرة_القصر_ريم‬
كائن جميل لدرجة بعيدة .. بتمر فـ أي مكان بتسيب أثر.. تلاقي المكان بقى أبيض وأسود .. وبتفضل هيا بالألوان .. أميرة القصر تركت قصرها وآثرت أن تكون بيننا .. عندما ألقاها أظن حولها حدائق وزهور وقد نبتت في لحظتها .. عندما تلمس الأشياء تتغير .. نعم تتغير .. تتغير حالتها .. أرى الأشياء تضحك ..وتضحك.. أرى الكون مبتهج .. أرى الشمس تغازلنا .. وأرى السحب تظللنا.. كل الصفات المبهجة فيها .. دون تكلف أوعناء .. تشع طاقة إيجابية .. لما تشوف ابتسامتها بتبقى مستعد تعمل أي حاجة .. طب نظرة عينيها اللي ممكن توقفك كتير سرحان فيها .. مينفعش تقول عليها جميلة .. أصل هتوصفها جميلة إزاي وانت مشوفتش جمال كده .. لذلك أنا مسمحلكش .. هيا ممكن تبقى معيار للجمال .. المقياس اللي على أساسه ممكن نقول اللي قدامنا ده جميل ولا لا .. هيا الجمال بنفسه تجسد في فتاة نورانية....
....
‫#‏لقاء_ريم_مهند‬
(بيفتحلها باب التاكسي)
مهند : وحشتيني
ريم : وانت كمان
مهند : أنا كمان إيه ؟
ريم : انت كمان
مهند : أيوة .. أنا كمان إيه ؟
ريم : إنت كمان يا مهند
مهند : ما أنا عارف .. أنا كمان إيه ؟
ريم : يوووو بقى .. انت كمان كده
مهند : اللي هوا إزاي ؟
ريم (بتبص الناحية التانية) : وحشتني
مهند : اتفضلي الفيتامين
ريم : إنت عودتني عليها كده
مهند : ومالو.. اتعودي .. أي حاجة هتخليكي مبسوطة هعملها
ريم : الشوكلاتة وكفى
مهند : ريم وكفى
(المطر بدأ ينزل بغزارة والناس بتستخبى )
(مهند بيشدها من إيدها وبيجري)
مهند (بصوت عالي): جاهزة ؟
ريم : لا استنى يا مجنووون
(بيجروا والمطر بيزيد أكتر فأكتر .. ريم فاتحه إيدها للمطر وكإنها طفل بيتعرف لأول مرة على العالم .. مهند بيشاورلها غمضي عينيكي وبصي للسما.. بتغمض عينيها وبترفع وشها في مواجهة المطر .. بتبتسم .. بتضحك .. بتبكي .. دموعها والمطر وجهان لعملة واحدة .. مهند بيبصلها .. سيب إيدي بدل ما أضربك .. يا طفلتي اللذيذة .. بحب بشرتك المبلولة دي .. شعرك اللي مفيش أمل طرحة تلمّه مع الجري .. بيبصلها ..تعالي نلحق موبايلاتنا قبل الماية ما تموتها ..بيبصلها .. يلا ناكل ايس كريم .. من غير شوكلاتة .. خلاص بشوكلاتة متزعليش .. ايه ده ؟ مناخيرك إحمرت ليه كده ... كده؟ بتضحكي عليا عشان العربية غرقتني وهيا ماشية بسرعة ؟ ..إنت طويل كده ليه ؟ .. أصلا عينيكي وسط المطر بيتغير لونها ... طلعي ايدك من الجاكيت بتاعي يا رخمة ... لا هوا كده .. ما انتي معاكي جاكيت .. متطلعيليش لسانك بقولك .. طب هجيبك ..
تعالي نضحك سوا .. جاهزة ؟ .. واحد اتنين تلاتة ....
..............................

• 

•