قصة ريم ومهند.... الحدوتة الأولى

مقدمة...
‫#‏ريم‬ و ‫#‏مهند‬
"ريم ومهند"
ريم هيا اختصار كل بنات العالم فـ بنت واحدة .. ريم هيا اختصار لأوصاف الغزل في كلمة "مزة" .. ريم يعنى طفلة طيبة بريئة رقيقة ذكية شقية عنيدة لذيذة جميلة وأم فـ نفس ذات اللحظة ..ريم يعني مُدرّسة رسم ذات طابع خاص .. ريم هيا المصدر العام للاحساس .. هيا أيقونة السعادة الحقيقية الموجودة في هذه الحياة .. ريم دائما وأبداً هي بنت مصرية بامتياز ...

مهند محامي و شاعر وبيكتب روايات .. مكانش فـ يوم مؤمن بتحقيق الامنيات .. مهند إنسان .. بيجمع ما بين الجد والهزل والهموم والروقان .. كتلة مشاعر متناقضة تناقض غريب .. حاصل جمعها يساوي نتايج أغرب وأغرب .. القدر كان بيجهزه طول عمره عشان يقابل الحب اللي يعمل منه فنان .. مهند هوا اختصار لجيل كامل بيحلم بتغيير الزمان والمكان ..ودائما وأبداً هو شاب مصري بامتياز ..
ريم ومهند .. حلم وقضية .. وبشرة خمرية .. وقصة حب حقيقية ..
....................................................................................................................................................................................
‫الحدوتة الأولى ..
.....................
‫#‏الشمس‬
*الشمس مغطية السما بلونها الدهبي وكأنها أم حضنانا فـ أيام خريف .. خايفة علينا من برد ليل وقسوة زمن .. بحنيتها تحس إن الجو بيطبطب عليك .. انهارده عيد الحب .. وده اليوم اللي ممكن تختبر فيه انجازاتك العاطفية .. شايف لون أحمر فـ كل مكان وناس لذيذة وبتحب الحياة ..*
*فـ كلية الفنون الجميلة*
*ريم لوحة جميلة مرسومة بنسب مظبوطة ..جميلة جدا بس زي ما انتو عارفين البنات الجميلة ملهاش نصيب فـ الحب ..لذلك هيا مش من البنات اطلاقا اللي بتهتم بالفلانتين والكلام الفارغ ده ريم أكبر من كده.. اهتماماتها روحانية فيزيقية .. ربنا يسامحني ع الكدب ده*
إيمان (انتيم ريم) : انتي بتعملي ايه غير الرسم يا ريمه .. يا حبي انهارده الـ ...
ريم : الفلانتين . و بس بقى متفكرنيش يا مونه .. انا سينجل عارفة يعني ايه ؟ (ايموشن بيعيط)
ايمان : لا
ريم : يعني وحيدة
ايمان : يا قلب اختك تعالي فـ حضن ماما
* ريم مش بتهزر دايما فـ موضوع الحضن ده .. فعلا هيا محتاجاه من حد قريب .. هقولكوا ايه ؟ اصل الحضن ده حركة قديمة أقدم من الانسانية نفسها .. معناه أكبر من مجرد التقاء جسدين .. الحضن معناه أمان وراحة بتهرب جواه من أى تهديد أو وجع.. ساعتها هتقدر تسترخي وترتاح لأنك هتحس بالحماية والتفاهم من أقرب حد ليك*
ريم : أنا بحبك يا بت يا مونه والله ..
ايمان : وانا بموت فيكي يا قلبي ..عاوزين نتفرج ع الدباديب والقلوب هنخرج بالليل شوية وأنا هقول لطنط عشان متقلقش عليكي ..
ريم : ماشي نتقابل بالليل
* فـ كلية الحقوق *
‫#‏مهند_ريم‬
* مهند فعلا من الشباب غير المعترفة بما يسمى الحب .. أصل هيعرفه منين ؟ البيه كان بيحب بنت وهوا فـ ابتدائي لحد الثانوية وكل السنين دي معرفش يعترف بحبه .. يبصلها بحب بس بيتكلم كأخ .. يجري عليها لما يشوفها ومحضّر كلمة بحبك عشان يقولها ..وأول ما عينيها تيجي فـ عينه يبقى بطة بلدي .. فضلوا يتعاملو كإخوات ..لحد ما بقوا فعلا اخوات .. عشان كده هوا عملي جدا مؤمن بالصداقة والأخوة ودايما يقول الحب مشروع ارتباط غالبا ما يفشل .. مليش دعوه ده هوا اللي بيفكر كده*
أحمد (انتيم مهند) : أوي بقى انهارده الفلانتين وهنهيص .. البت آلاء سألتني عليك ..والشلة كلها مجتمعة ..
مهند: اممم .. آلاء ..عارف يا ابو حميد ؟
أحمد: ها
مهند: كتير بزعل على اسم " آلاء " ده لا تعرفله ده علاء ولا آلاء ..شعور سخيف (بصوت هشام الجخ) ..
أحمد : ههههه انت فاصل خالص يا معلم
مهند : تفتكر لو انا حبيت ممكن حالي يتصلح وابقى برنس في ذاتي كده ؟
أحمد : لالا انت تاخد شاور بتاعك وتجيلي وانا هضيعلك الدماغ دي..
مهند: ماشي نتقابل بالليل ..
* الليل صفحة نهار انتهت صلاحيتها .. وضعف وخوف إلا بقى لو معاك حبيبك ساعتها بس ممكن يبقى الليل هوا مصدر الالهام*
........................................
إلى لقاء آخر نكمل فيه الحكاية ..

• 

قصة جميلة ننتظر ابداعك اخي
شكراااااااا بالتوفيق
تقبل تحياتي

•