ريم ومهند الحدوتة الثامنة

الحدوتة الثامنة ...،
‫#‏ريم_مهند‬
.........................................
‫#‏فستان‬
(في هذه الاثناء يظهر مهند ومعاه بوكية ورد أحمر ولابس بدلة سوداء )
ريم (بتحط ايدها على بؤها وبتصرخ): ايه ده ؟
مهند : اتفضلي
ريم :الله .. حلو أوي.. عرفت منين اني بحب الورد؟
مهند : أنا جاي أوعدك إني مش هبعد عنك ..
ريم : لا مش ممكن ..انا بحلم ولا ايه ؟ انت بجد هنا ؟ (بتبص حواليها)
بيمسك ايدها اليمين ويبوسها و ايدها الشمال ماسكة الورد وبتحاول تستوعب اللي بيحصل.. مهند بيطلع رسالة من ورق شبه البردي وبينحني ويقدمها لريم وبيقول : اتفضلي يا مولاتي
ريم (بتمسك الرسالة وبتفك الشريط بتاعها وبتقراها وهيا بتبكي) .. *ريم يا ملاكِ البريء .. انتي فتاة أحلامي .. انتي اختصار لكل أميرات العصر القديم .. وملكات جمال العصر الحديث *
ريم دموعها غطت وشها .. هتحتاج وقت عشان تستوعب اللي بيحصل معاها ..
مهند بيشيلها ويلف بيها وينزلها .. وبيطلع الموبيل وبياخد أول صورة سيلفي في السنة الجديدة مع ريم .. الناس اتلمت وبيصوروهم ..
*في هذه الاثناء يظهر صوت عميق .. صوت بيقترب بيقترب بيقترب ...*
- يابني قوم بقى نام جوه نايم فـ الصالة ليه ؟ خلاص غيرت الملايات .. انت مالك نايم بتضحك كده ليه ؟ .. انت اهبل ؟
مهند (بيفرك عينيه ): ايه ده ؟ أنا فين ؟
أم مهند : انت فـ الصالة يا حبيبي.. نايم على الكنبة ليه ؟
مهند: إيه ده انا كنت نايم .. صحيتيني ليه بس ؟
أم مهند : طب قوم نام جوا
مهند : أنام إيه بس ؟ .. كان أحلى حلم ....
....
‫#‏إيمان‬
إيمان : كل ده نايم .. رنيت عليك عشر مرات
أحمد (بصوت يملؤه النوم) : لا مش نايم أنا صاحي أهو
إيمان : كل سنة وانت طيب ..
أحمد: وانتي طيبة يا ايمان والسنة الجاية تبقي متجوزة ومخلفة وكده
إيمان: مش عاوزة اتجوز انا يا بني
أحمد : انتي متأكده انك مصرية
إيمان: آه طبعا .. البنات فـ مصر بيتجوزوا لأهداف تانية غير الجواز
أحمد: زي إيه يعني ؟
إيمان: زي انها تتجوز عشان متبقاش مش متجوزة .. زي انها تغيظ بنت عمتها اللي لسه متخطبتش .. او انها تغيظ بنت خالتها اللي اتجوزت وفرحت فيها ... امراض اجتماعية وكده
أحمد : ماشي اقتنعت والله
إيمان : لو الجواز كده مش عاوزاه .. المهم سهرتوا فين امبارح؟
أحمد: ولا روحنا ولا جينا .. الدنيا كانت زحمة .. قعدنا نتابع عزب شو
إيمان : ههههههه .. ماشي الحال من بعضه
....
مهند : ازيك
ريم: الحمد لله يا مهند ..وانت
مهند : المهم انتي .. كل سنة وانتي طيبة
ريم : وانت طيب وبخير دايما ..اسكت يا مهند امبارح اتفرجنا انا وماما على مسرحية " سك على بناتك " وموتنا على نفسينا من الضحك .. انا أول مرة أضحك عليها كد...
مهند : أنا حلمت بيكي
(صمت)
مهند : ريم
ريم: بجد؟
مهند : آه والله .. كان حلم جميل
ريم : طب ينفع تحكيهولي ؟
مهند : كنا مع بعض
ريم : وبعدين
مهند : بوست ايدك
ريم : لم نفسك ..
مهند : والله .. بالامارة كانت اليمين
ريم (بتتنهد) : وأنا وافقت ؟
مهند: انتي ما صدقتي أصلا
ريم : هههههه يا سلام
مهند : امممم
ريم : طيب خلاص
مهند : وجيبتلك شوكلاتة
ريم: طب هيا فين ؟
مهند: ههههه يعني سيبتي كل حاجة ومسكتي فـ دي وعاوزاها ؟
ريم : آه .. هتجبلي شوكلاتة
مهند : ده أمر ؟
ريم : آه أمر عسكري .. نفذ يا حضرة الظابط مهند .
مهند : تمام يا افندم .. عُلم وينفذ
ريم : ههههههه .. برافو شطور
مهند : أي خدمة ..ريم أنا ...
ريم : انت ايه ؟
مهند : أنا بعزك
ريم : ميرسي يا مهند
مهند : بقيت بحب اسمعها
ريم : ميرسي؟
مهند : امممم
ريم : طب بطل
مهند : حاضر
ريم : هشوفك فـ الكورس
مهند : اوك ..
.....
عماد : حضرتك أنا زميل ريم
أم ريم : بس هيا مش هنا يا بني
عماد : حضرتك أنا عاوز آجي أتكلم مع حضرتك بخصوص ريم
أم ريم : تشرف يابني
عماد : بكرة بالليل كويس
أم ريم : ماشي
عماد : شكرا حضرتك مع السلامة
أم ريم : مع السلامة يابني
....
‫#‏كورس‬
* فـ الكورس ممنوع الكلام *
مهند و ريم بقى مكانهم المفضل قدام بعض .. بينهم وبين بعض متر واحد .. هذا الفارق الزمني لم يمنع عينيهما من التواصل ... عينيه دايما بتكلم عينيها:
مهند (بيشاور بعينيه لريم تفتح الشنطة )
ريم (فهمت وفتحتها)
مهند ( بيحط الشكولاتة )
ريم (بدأت تبتسم )
مهند ( بدأ يحس بالرضا)
ريم ( بدأت تحس بالسعادة)
مهند (بدأ يحس بانها مسئولة منه)
ريم ( بدأت تحس باهتمامه)
مهند ( فضل يبتسم )
ريم ( فضلت تبتسم )
عماد بدأ يحس بخطورة مهند ...
....
* أحمد جنب إيمان *
أحمد ( بيشاور لإيمان تفتح الشنطة)
إيمان ( بتفتح الشنطة )
أحمد (بيبص فيها على أي حاجة حلوة بيلاقي تشكلتس فبياخد واحدة)
إيمان ( بتحاول تكتم صوت الضحكة)
أحمد (بيهرش فـ دماغه)
....
*فـ بيت ريم*
أم ريم: يلا يا حبيبتي إلبسي ده
ريم : مقولتليش ليه يا ماما ؟
أم ريم : الموضوع جه بسرعه
ريم : طب مين ده ؟
أم ريم : واحد شافك وعجبتيه
ريم : سامحيني يا ماما مش هطلع
أم ريم : عاوزة تصغرينا قدام الناس ؟ هطلع للناس ورجعالك
(عماد ووالديه يجلسون مع عم ريم الأوسط والاكبر)
أم ريم : انتو شرفتونا والله
أم عماد : الشرف لينا يا حبيبتي
أم ريم : ثواني هجيب حاجة ساقعة وتدوقوا عمايل ريم فـ الكيك
أم عماد (بخبث) : ومالو طبعا
والد عماد (موجها كلامه لعم ريم الاكبر) : دي جلسة تعارف ان شاء الله ومعرفة خير
عم ريم : طبعا طبعا .. باين على ابنك انه ماشاء الله ميتعيبش
أم عماد : عماد .. هوا في زى عماد ؟ .. ابني بيشتغل فـ شركة بترول .. بيقبض ألفين جنيه .. ده البنات هيموتوا عليه .. والله أنا كنت عاوزة أجوزه بنت واحده صاحبتي لكن..
والد عماد (مقاطعا) : خلاص يا ام عماد .. طالما عماد اختار ريم تبقى ريم .. واحنا تحت أمركم في أي طلبات .. عماد ابني جاهز
عم ريم الاوسط : احنا يهمنا بنتنا تبقى مبسوطة ..واللي فيه الخير يقدمه ربنا ..
( في هذه الاثناء تدخل ريم .. برغم كل الحزن الذي يملؤ عينيها .. إلا أن مكونات جمالها لم تتأثر .. اكتئابها لن يفيد .. فجمالها حيث الحزن يزيد ..)
ريم : السلام عليكم
= وعليكم السلام ورحمة الله .. بسم الله ما شاء الله .. لا فعلا عندك حق ... أه والله .. مش قولتلك .......
ريم : بعد إذنكم
أم ريم : خليكي شويه ..
عم ريم : استني يا ريم
أم عماد : طب بصي لعريسك
( ريم بتستجيب وبتبص للعريس وإذا به زميلها )
ريم (متفاجئة) : عماد ؟؟
عماد (مبتسما) : ازيك
(تكتفي ريم بالنظر إليه وداخلها الكثير من اللوم .. لماذا لم تصارحني أيها الأبله قبل أن تأتي إلى بيتي ؟ )
....
‫#‏أم_مهند‬
أم مهند : سرحان فـ إيه ؟؟
مهند : من غير تريقة ؟
أم مهند : لا متقلقش .. أنا مش فـ المود
مهند : بنت معايا فـ الكورس
أم مهند : ريم
مهند : عرفتي إزاي يا لئيمة ؟
أم مهند : سمعاك بتكلمها بقالك فترة.. إنت فكرك أنا قاعدة هنا طيشة ولا إيه ؟ .. أنا عارفه كل حاجة بتحصل .. أنا برج الاسد .. من صفاته إنه بيقراها وهيا طايرة..
مهند: ماشي يا سيطرة .. وايه العمل ؟
أم مهند : .......
..........................

• 

•