ريم ومهند الحدوتة الرابعة عشر

الحدوتة الرابعة عشر ....،
‫#‏ريم_مهند‬
.................................
بالليل .. وبعد ما المخلوقات كلها بتنام .. بيصحى بس .. إللى قلبه مليان كلام .. بيصحى بس إللى بيكتب قصة تلخص حياة .. مليانة بالأحلام .. بيصحى بس .. إللى دموعه بتمنع النوم عن عينيه .. اللي جسمه بيرتعش وحاضن نفسه بإيديه .. بيصحى بس اللي قلقان .. قلقان على حد كان ليه وراح .. أو حد بقى ليه .. ووجوده فـ حياته بقى هوا البراح .. أو حد هيبقى ليه .. ولقاه بعد تعب وكفاح ..
.....
‫#‏أم_مهند‬
*أم مهند وهيا راجعة من برة بتلاقي جارتها فاتحة الباب فبتسلم عليها على السلم *
(الساعة السادسة مساءً)
أم مهند : إزيك يا أم محمد
أم محمد (مع قبلات لها صوت) : إزيك وإزي عيالك .. إيه مش باينة ؟
أم مهند : العيال بقى والشتا الواحد بينام بدري .. عاملة إيه انتي ؟
أم محمد : الحمد لله
أم مهند : يستاهل الحمد
(الساعة السابعة مساءً)
أم محمد : السلم محتاج يتنضف كل يومين .. أنا هبعت أجيب اسماعيل ينضفه
أم مهند : لا ده معندوش ضمير .. المرة اللي فاتت منضفش المنور كويس
أم محمد : ولا الاسانسير .. بيعطل كتير
أم مهند : والله الواحد ما عارف يلاقيها منين ولا منين
(الساعة الثامنة مساءً)
أم محمد: والله لـ تيجي تتفضلي نتكلم جوا أحسن
أم مهند : مرة تانية بقى .. معلش أصلي مستعجلة
....
‫#‏ريم_إيمان‬
ريم : والله إحنا نفسنا مش مصدقين
إيمان : الف مليون مبروك .. عاوزين نحتفل بقى كده
ريم : لسه شوية لما يحصل .. المهم انتي اخبارك ايه ؟
إيمان :أنا بيييس .. ماشي الحال
ريم : وأحمد ؟
إيمان : أحمد ده ابني .. ناوية أربيه
ريم : خلي بالك على قلبك يا ايمان
إيمان : متقلقيش عليا
ريم : هتعملي ايه دلوقتي ؟
إيمان : هكلم أحمد طبعا
ريم : ماشي يا قمر باي
....
‫#‏مهند_أحمد‬
أحمد : يعني موضوعك دخل فـ الجد ؟
مهند: عقبالك يا معلم كده
أحمد: لا لسه بدري أنا ..اتجوز انت ولو الدنيا لقيتها حلوة هتجوز وراك علطول
مهند : طب وايمان ؟
أحمد : إحنا صحاب
مهند : طب و رحمة
أحمد : صحاب
مهند : إوعى تكسر قلب بنت يا زفت انت .. بلاش شغل ثانوي ده واكبر بقى ..
أحمد : صاحبي فلفسوف
مهند: اسمها فليسوف يا جاهل .. روح شوف وراك ايه ..
أحمد : ورايا رحمة اهي ع الويتنج .. سلام يا كبير
مهند : سلام يا أبوحميد .. ربنا يهديك
...
‫#‏بسنت_إبراهيم‬
والد بسنت : ممكن تعدي عليا بكرة
إبراهيم : ليه يا عمي ؟
والد بسنت : لما تيجي هتعرف
إبراهيم : بسنت عندك ؟
والد بسنت (بعد تفكير) : نايمة يا بني
إبراهيم : فعلا يا خبر بفلوس .. بكرة يبقى ببلاش
والد بسنت : ربنا يديك الصحة يا ابراهيم والله أنا بعزك يابني برغم أي حاجة ...
إبراهيم : متقلقش عليا .. أنا لسه واقف على رجليا
....
*كوني مش جنبك .. مش لامسك .. ده مش ممكن يبعدني عنك .. أو يبعدك عني .. كونك بعيد عن عيني .. ده مش مبرر للنسيان .. أو مبرر للبعد عن قلبي .. عارف إننا صعب نكون مع بعض بالليل .. أنا يا سيدي كفاية عندي أشوفك بالنهار .. بس بشرط أسمع صوتك بالليل كمان.. صوتك هو الجسر اللي بيربط الليل بالنهار بتاعي .. انت عارف موبايلك شحنه إمتى بيخلص ؟ .. لما أسكت أنا فـ وسط المكالمة.. لما تغيب عن بالي وانت معايا .. لما نهرب من مشاكلنا .. لما ننسى أحلامنا ..غير كده بتفضل إنت طاقتي اللي بواجه بيها العالم .. ربنا ميحرمنيش من صوتك *
.........
‫#‏في_عالم_آخر‬
ريم : الو
مهند : ...
ريم : الو
مهند : ...
ريم : مهند
مهند : لالا عاوز أسمع " الو" تالت .. حلوة جدا
ريم : يا راجل يعني انت كنت سامعني كل ده؟
مهند : نبرة صوتك حلوة فـ التليفون
ريم (بتضحك من الكسوف )
مهند : انتي ممكن تغني على فكرة
ريم: أنا صوتي وحش جدا فـ الغنا
مهند : بالعكس .. مين اللي قالك كده ؟
ريم : ماما
مهند : لا ماما دي من أعداء النجاح .. خدي بالك بقى
ريم : ههههههههههه
....
‫#‏أحمد_رحمة‬
رحمة : ميدو إزيك
أحمد : إيه يا رحمة .. إزيك انتي
رحمة: أنا ذاكرت زي ما انت قولتلي .. وعملت ملخص لكذا مادة وهصورهولك ..
أحمد : كمان ؟
رحمة : أيوة طبعا .. عشان ننجح سوا
أحمد: مش عارف أقولك إيه .. تسلم إيدك
رحمة : عيب عليك انت تؤمر
أحمد: عاوزأسألك سؤال
رحمة : اتفضل
أحمد : هوا انتي ممكن تزعقي أو تشتمي أو تضربي أي حد بهزار أو جد ؟
رحمة: لا طبعا .. بتقول إيه .. أنا مبشتمش خالص .. ولا بحب مد الإيد .. طب سلام دلوقتي يا ميدو.. معلش بابا بينادي هقوم أحضرله العشا .. أيوة يا بابا حاضر
أحمد : ايه البت دي .. ملاك
(يرى إبراهيم متظاهرا بالنوم في السرير المقابل)
أحمد : ما تجمد كده ياض
إبراهيم : بتصحيني ليه ؟
أحمد : انت مش نايم أصلا
إبراهيم : ما اهو من صوتك ف التليفون
أحمد : لا .. ياما كنت بتنام وتشخر وانا بتكلم .. مالك ؟ .. اجمد كده .. شوية تعب وهيروحوا واللي يبيعك بيعه
إبراهيم : بالسهولة دي
أحمد : لالا مش طالبة دراما وموسيقى حزينة .. بص الحيطة دي
(بيمسك المخدة ويضربه بيها فـ يرد عليه بشوية ماية .. فبيتقلب الزعل لضحك وهزار)
....
‫#‏مهند‬ و ‫#‏ريم‬
مهند : أنا تشتغليني ومتسلميش عليا ؟
ريم : أنا ؟
مهند: أمال أمي ؟
ريم : إطلاقا يا حبيبي .. أنا سلمت عليك
مهند : يا سلام بقى هيا كده ؟
ريم (بتطلعله لسانها )
مهند : مفيش رد ؟
ريم : لا رديت
مهند : والله ما سمعت .. طب تاني
ريم (بتطلعله لسانها تاني)
مهند : أنا شكلي مبقتش بسمع ولا ايه ؟
ريم : أنا رديت تاني
مهند : طيب قولتي ايه ؟
ريم :لا مقولتش أنا كنت بطلعلك لساني
مهند : كمان بتتريقي .. ماشي لما أشوفك
ريم : متقدرش .. هبلغ عنك وأقول بيتحرش بيا
مهند : هقولهم وأنا مستعد أصلح غلطتي واتجوزها وش
ريم : هههههههه لالا خلاص عفونا عنك ..
....
‫#‏إيمان_أحمد‬
إيمان : خليك صريح كده وتعالالي فـ الدوغري .. رقمك كان مشغول ..كنت بتكلم مين ؟
أحمد: أمي
إيمان : أحمد ؟
أحمد : واحد صاحبي
إيمان : أحمد ؟
أحمد : إبراهيم أخويا
إيمان : أحمد ؟
أحمد : رحمة
إيمان : إيوة رحمة ..ومكسوف ليه ؟ .. براحتك خالص
أحمد : أنا ورحمة زمايل
إيمان : ومالو .. لما أشوفها بنت الـ..
أحمد : متشتميهاش بقى
إيمان : كمان ؟ .. ماشي .. خليها تنفعك يا زفت
أحمد : الله على زفت دي ..
إيمان : زفت وقطران
أحمد : يا سيدي كمان كمان
إيمان (متغاظة جدا فقفلت السكة فـ وشه)
أحمد : شبكة محمول بنت كلب
....
#ريم و #مهند
ريم : إنت بتحب المطر أوي كده ؟
مهند: على فكرة ..وانتي كمان بتحبيه
ريم : يا سلام ؟
مهند : طبعا .. أنا متأكد
ريم : اثبتلي
مهند : ماشي .. لما بتسمعي صوت المطر فـ الشارع وإنتي تحت الغطا .. بتفرحي ؟
ريم : آه
مهند : عارفة ليه ؟
ريم : ليه ؟
مهند : لإنك بتحسيه ونس ليكي فـ وسط سكون الليل
ريم : امممم
مهند : طيب.. لما المطر يوصل لحد شباك أوضتك ويبدأ يخبط على شباكك .. بتفرحي ؟
ريم : آه ..دي فعلا
مهند: لإنك بتحسيه أقرب ليكي من أي شيء .. قادر يقتحم عزلتك ..
ريم : امممممم
مهند :كل الفرح ده وانتي والمطر بينكم حواجز .. فما بالك لو إنتي فـ الشارع .. لامسه المطر ولامسك ؟ .. حالة من الترابط والتلازم .. أقرب ما يكون .. خصوصية عجيبة ..
ريم : الله
مهند : المطر أنقى ما في الوجود .. سيبيه يلمسك فيغسل روحك ويطهر قلبك
ريم : لازم نجربها
مهند : أوامرك تنفذ يا مولاتي
....
‫#‏أحمد_إيمان‬
إيمان : طب أنا غلطت فـ إيه ؟
أحمد : مغلطتيش
إيمان :طيب أنا ليه حساك متغير
أحمد: أنا مش متغير ..
إيمان :طيب فهمني
أحمد : يا إيمان .. إنتي بتلغي شخصيتي دايما .. الكلام ده المفروض مقلهوش .. انتي بنت وانا راجل ..
إيمان : تعرف إني أول مرة ألاقيك عاقل كده
أحمد : تاني ؟
إيمان : وحياة أمك إنت عسل
أحمد : وانتي مزة كده شرقية متنمردة
إيمان : إيه ؟
أحمد : مزة شرقية
إيمان : لا اللي بعدها يا ابني
أحمد: متنمردة
إيمان : متمردة يا جاهل
أحمد : أنا عارف بقى ؟..ليه كل اللي يقابلني يقولى يا جاهل ؟ .. وعموما انتي شرقوية متنمردة
إيمان : ضاعت مفردات اللغة
أحمد: اللي ضاع ندوروا عليه
إيمان : متزعلش
أحمد : مش زوعلان
إيمان : صافي يا لبن
أحمد : حليب يا بودرة
(بيضحكوا كالعادة لحد البكا .. مهما كانوا شايلين من بعض.. إلا إنهم دايما بيتلاقوا )
....
‫#‏سيندريلا‬
مهند: عندما تتوجه عقارب الساعة إلى الثانية عشرة بعد منتصف الليل .. فلتهربي يا سيندريلا قبل أن تعودي حافية القدمين .. رثة الثياب .. خادمة عند الأثرياء .. قبل أن ينكشف المستور....
ريم : تاني يا مهند الجملة دي .. متقراش بسرعة .. عشان أعرف أنام
مهند : حاضر يا أميرتي .. عندما تتوجه عقارب الساعة إلى الثانية عشرة بعد منتصف الليل .. فلتهربي يا ريم
ريم (بصوت يملؤة النعاس): لا سيندريلا مش ريم
مهند : انتي سيندريلا
ريم : وانت الأمير ؟
مهند :لا .. أنا واحد من الرعية بتاعتك .. شوفتك من بعيد .. حلمت .. دعيت .. ربنا استجاب .. قربت منك .. فبقيت أمير
ريم : يعني انا خليتك أمير .. ولا انت خلتني أميرة ؟
مهند : انتي أميرة حقيقية .. غصب عني أو برضايا .. مش عارف جيتي فـ الزمن ده إزاي ؟.. بس يبدو إن حد استغل ثغرة زمنية معينة .. أو طفل كان بيلعب فـ آلة الزمن فـ جيتي حضرتك للزمن بتاعنا ..ولو مقتنعتيش بكلامي فـ انتي أميرتي أنا على الأقل .. وده أنا مليش فضل فيه ..
(تغمض عيناها في سكون وقلبها ينظر حيث مهند )
مهند : و دعاها لترقص معه من بين جميع النساء وأحاطها بذراعيه لتستقر بين أحضانه كيفما شاء ..........
....
النهار .. فـ وسط فنون الشر .. وغدر البشر .. وضلمة القلوب .. بتظهر طاقة نور .. مع آذان الفجر .. يوم جديد .. يغير هيأتك .. ويلهمك القرار .. النهار.. روح موصولة بيك .. بريد مستعجل .. جاي مخصوص ليك .. النهار .. هو بداية اللا نهاية ونهاية اللا بداية .....
..............................

• 

•