ريم ومهند الحدوتة الرابعة

الحدوتة الرابعة .....،
" ريم ومهند "
*فـ البريك*
ايمان : اسمه مهند يا بت .. صباح المسلسلات التركي
ريم : ايمان مش ده اللي اتخانق عشانا يوم الفلانتين ؟
ايمان : استني كده .. يابنت الايه .. والله شكله هوا .. ايه الصدفة العجيبة دي ؟
ريم: طيب متبصيش أحسن ياخد باله
ايمان : ماشي
* ريم .. صاحبة الصوت المُبهج .. برغم عينيها اللي كلها حزن .. الا انها من أكثر البنات ضحكا .. عارفين .. انا كنت فاكر ان بلدنا دي الجمال فيها نسبي .. لحد ما شوفتها .. ريم فعلا من اجمل البنات اللي ممكن تشوفها على الاطلاق .. مينفعش تكون بنت عادية .. أكيد أميرة على شعب معين أو جايه من عالم آخر .. ومش عينيها زرقا ولا خضرا .. بس عينيها السود تديك درس فـ الجمال .. بشرتها لونها خمري .. بس تشوف من خلال بشرتها دي الورد إزاي بيفتح .. تفضل تقول ما شاء الله .. ولا ابتسامتها .. ابتسامتها أذان الفجر اللي بيكسر طغيان الليل .. وبيخلص البشرية من الشر .. صوت ضحكتها العالي يضحكك غصب عنك .. لما تشوفها وهيا بتتكلم مش ممكن تقول دي مصرية صرف .. لازم يتبادر إلى ذهنك انها أجنبية ودخلت الاسلام قريب.. دي جايه تعلمنا انجلش مش تتعلم يا جماعة.. بص م الاخر كده .. لو ناوي تحط مواصفات لفتاة أحلامك لازم تشوف ريم الاول .. دي نصيحة لوجه الله..*
*بعد الكورس*
البنات بينزلوا من المعهد وسلموا على بعض .. ايمان ركبت التاكسي وريم لسه .. على بعد خطوتين في شباب كان واقف على الناصية واول ما شافوا ريم لوحدها مشوا ناحيتها.. مهند متابع من بعيد .. راح واصل عندها ومشى جنبها لحد ما عدوا الشباب اللي واقفين .. ووقف تاكسي ليها وفتحلها الباب وركبت ريم وقفل الباب ووطى علي الشباك وقالها : انا مش كل يوم هنقذك يا هانم ؟
ريم (بتخبي وشها) : انت لسه فاكرني ؟
مهند : طبعا يلا خلى بالك على نفسك
ريم : وانت كمان يا مهند
*القدر .. بيغير مجرى حياتك فـ لحظة .. ينورلك طريق مكانش فـ حسبانك .. يعوضك عن اللي اخده منك .. القدر دائما له الكلمة النهائية*
....
* مهند بيته قريب من الكورس بيتمشى دايما ..وده الوقت المفضل للتفكير .. قد إيه البنت دي جميلة .. رقتها مش ممكن .. ابتسامتها بلسم .. ربنا يستر......
أحمد (مقاطعا): ايه يابني مالك؟
مهند : ده انت فصلتني
أحمد: أصلي شايفك كده مش هنا .. مالك انت تعبان ولا ايه ؟
مهند : باين كده
أحمد: ريم
مهند : نعم؟
أحمد: ريم
مهند : مالها؟
أحمد: صاحبتها دي طويلة كده وشمخة
مهند : شمخة ؟ أبوألفاظك
أحمد : حاجة كده اكسترا
مهند : طب بس بس
أحمد : ما تكلمهالي انت رومانسي وكده
مهند : انت عاوز ايه يا أهبل انت ؟
أحمد: مفيش .. اللي اسمها ايمان دي عاجباني ..هخش أكلمها ع الفيس
مهند : طيب
أحمد : انا قولت أقولك يمكن عاجباك ولا حاجة.. انت صاحبي برضك ومحبش أزعلك .. ومفيش بنت تفرقنا وكده
مهند : أحمد مش عاوزين مشاكل فـ الكورس
أحمد : أنا شايفك مركز كده مع صاحبتها
مهند : صاحبة مين ؟
أحمد : مع صاحبة إيمان ده حتى أنا...
مهند (مقاطعا): لا خالص .. انا مفيش بنت بتعجبني .. ما انت عارف
أحمد : آه صح
مهند : هتيجى تتغدى معايا .. أمي قالتلي عامله مفاجأه ع الغدا
أحمد : لا يا عم .. انا هلحق أروح اكلم ايمان قبل ما تنام
مهند : ماشي ربنا يستر .. سلام
أحمد : تيك كييير
مهند : يخربيت اللي علمك .. سلام
....
*مكالمة طويلة كالعادة*
إيمان : الواد ده اهبل اوي
ريم : ليه حرام عليكي ؟ ده شكله غلبان وطالما صاحب مهند يبقى أكيد زيه
إيمان: مش عارفه .. بس لقيته بيقولى انتى بتفتحى فيس امتى ؟ ههههه
ريم : وقولتيله إيه ؟
إيمان : قولتله أول ذا داي .
ريم :طب ليه ؟
إيمان : مفيش حسيته دمه خفيف قولت أضحك شويه .. فاني
ريم : طيب براحة عليه .. احمد ده مش قد كلامك .. وكمان ده صاحب مهند
إيمان : مهند مهند .. ايه الحكايه يا قمر ؟
ريم : حكاية ايه ؟ .. والله ما في .. كل الموضوع انه جدع فأنا اعتبرته أخ
إيمان : أخ ؟ قشطات
ريم : خليكي معايا .. ماما بتنادي ..
....
مهند : ها عاملالنا ايه بقى ؟
أم مهند : مفاجأة
مهند : يااا ماشي .. يعني أفرح ؟
أم مهند : أه أكل انت بتحبه
مهند : طب إيه ها ؟ إيه ها ؟
أم مهند : عملت كوسة
مهند : أيوة بق... إيييييه؟
أم مهند: كوسة.. مش انت بتحبها ؟
مهند (بغيظ) : لا .. هيا مش بتحبني
أم مهند: لا .. بتحبها
مهند : لا
أم مهند : بقولك بتحبها
مهند : بجد؟ جايز.. خلاص طالما بحبها .. حطيلي منها
أم مهند: ماشي
مهند : و زوديلي بقى ده شكلي بحبها أوي ..
أم مهند : هوا أصلا فاضل طبق واحد
مهند (ساخرا) : ليه بس ؟ زعلتيني عن جد ..
...
* على الفيس بوك*
أحمد : هاي يا ايمان
إيمان( بعد عشر دقايق): هاي
أحمد: عامله ايه
إيمان (بعد عشر دقايق أخرى) : الحمد لله
أحمد : ايمان انتى ليه بتردي متأخر
إيمان (وهي بتكلم صاحباتها) : معلش اصل النت وحش
أحمد : أنا معجب بيكي
إيمان : هههههههههه
أحمد : إيه ؟؟ انا شكلي هحبك
إيمان : ههههههههههههههههههههههههه
أحمد : بتضحكي عليا ليه
إيمان : .....
(بص يا زفت البرك هتقولى انتى جميلة اوى وبحبك من اول زفت نظرة وبعدها هبدأ اتعلق بيك وأتنيل أحبك معرفش على إيه وانت قطران لا نافع في حاجة ولا في منك رجا وتسيبني فى الاخر ويبقى رضينا بالهم والهم مش راضي بينا)
أحمد : مردتيش ليه يا ايمان ؟
إيمان : أه بص يا احمد خلينا صحاب .. بلاش الكلام ده
أحمد : ماشي يا قمر
إيمان : ومن غير قمر
أحمد : ماشي يا زفته
إيمان : ههههههههه والله انت اهبل
أحمد : وانتى مسخرة
إيمان (بتشتمه بألفاظ خارجه) : طيب هنام انا بقى
أحمد (متصورا إنها معجبه بيه) : طيب هتفكري فيا ؟
إيمان : ههههههههههه يابنى بس
أحمد (بجدية صارمة) : إذاً هسيبك تفكري فيا
إيمان : تصبح على خير
أحمد : وانتى من اهله
*كتير بياخد انتباهنا الشخص اللحوح الطيب اللي مستعد يتقبلك بكل عيوبك ويرضى بكل ردودك .. الشخص ده غالبا بيبقى حنون وعاوز يعمل أي حاجة عشانك إوعى تضيعه من إيدك . الشخص ده بيبقى حتى مش عارف قيمة نفسه.. للحب طرق أخرى*
...
*ريم شايفه مهند أون لاين وعاوزة تكلمه عشان تشكره على جدعنته معاها .. بتفكر فـ رد فعله .. يا ترى لو كلمته هيقول عليها ايه ؟ .. بتقول لنفسها هكلمه وخلاص .. هيا مرة واحدة بس أشكره عشان أنا مش بعرف أتكلم مع حد فيس تو فيس .. لالا مش هكلمه خلاص .. وهقفل الفيس .. بتقفله فعلا .. وبعد خمس دقايق .. بتمسك الموبايل ولا إراديا بتجيب الاكونت بتاعه وتقرا فيه .. عجبها كلامه .. رسايله لزوجته المستقبليه جميله أوي .. علاقته الكوميدي بأمه اللي دايما يكتب عنها .. رومانسيته .. وصفه للاشياء . صورته كمان مريحة جدا .. وحساه شبه باباها فـ حاجات كتير .. شكلها هتكلمه .. وفـ عز حيرتها تأتيها رسالته ..*
........................
وإلى لقاء آخر نكمل فيه الحكاية

• 

•