ريم ومهند الحدوتة العاشرة

الحدوتة العاشرة ...،
‫#‏ريم_مهند‬
................................
*الشتا ... هوا طبطبة السما عليك .. اعلان غير ممول بإن أبواب السما مفتوحة بس إنت تدعي .. ريحة المطر تديك شعور بالدفا .. لما دموع السما تنزل على وشك إوعى تمسحها .. لإنها طاقة أمل جيالك مخصوص .. كل اللي عليك فعله إنك تفتح إيديك باتساع الكون وتستقبل روحانيات السما .. غمض عينيك وبص لفوق وحس برقة المطر .. خد نفَسك واجري .. إجري بكل ما عندك .. افتكر حبيبك واضحك .. افتكر لحظات ضعفك وابكي بقوة .. سيب دموعك ودموع السما يمتزجوا .. فـ الشتا .. هتلاقي الشفا ..*
....
‫#‏إيمان‬
إيمان : كل ده حصل وأنا معرفش ؟
ريم: والله كل ده امبارح ..
إيمان : طب وماله عماد يعني ؟
ريم : ملوش بس أنا مرتحتلهوش
إيمان : ماله بس ؟ الراجل شاريكي وبيشتغل وعنده شقته و..
ريم : يا إيمان أنا مش طايقاه .. لما بشوفه بتخنق من غير سبب .. واللي غايظني إنه فاكر إنه لقطة وميتسابش
إيمان : بيني وبينك هوا لقطة
ريم : طب اتفضليه
إيمان : لا مليش نفس
ريم : أحمد عامل ايه ؟
إيمان : ده حبيبي ده .. هنخرج انهارده
ريم : ناس هايصة وناس لايصة
إيمان: هههههه لالا أنا معاكي أهو
ريم : لا عيشي حياتك يا قمر .. انا مش واقعة فـ مشكلة واحده ..دول اتنين
إيمان : إيه تاني ؟
ريم :قولت لـ عمي إن مهند عاوز يتقدم
إيمان : يخربيتك .. ايه اللي هببتيه ده ..
ريم : أنا عارفه بقى
إيمان : ابقي قابليني لو مهند وافق ..
ريم : والله عندك حق هوا ملوش ذنب يخش فـ مشاكل بسببي
إيمان : طيب ابقي قوليلي أول بأول حصل ايه ؟
ريم : ماشي .. ادعيلي
....
‫#‏أحمد‬
أحمد : آه هقابلها انهارده يا معلم
مهند : بتحبها ؟
أحمد : بص .. إيمان دي نصي التاني .. يمكن بنكمل بعض .. أو شبه بعض .. والله ما عارف .. بس انا مش بتكسف قدامها .. ولا بعمل حساب لتصرفاتي معاها .. ببقى على طبيعتي .. وهيا بتحب هزاري .. وانا بحب ضحكتها .. يعني كابل حلو
مهند : ربنا يهنيك والله ..
أحمد : الله يخليك
مهند : والله أنا طول معرفتي بيك ..كان نفسي أشوفك بتحب كده ومهتم بحد .. ربنا يفرحكوا انتو الاتنين
أحمد : آميين .. مش هينفع بقى أشوفك انهارده
مهند : عارف .. ماشي عيش يا معلم
....
‫#‏أم_مهند‬
أم مهند بتبص من الشباك على المطر ومبسوطة جدا .. دايما ليها تفاسير خاصة لحدوث الأشياء .. يعني المطر ده غسيل للبلح .. ربنا بيفرح الناس .. لو طبخت الملوخية أو البامية و طلعت مش حلوة ده مش بسببها .. إطلاقا .. ده بسبب إن الأرض بتاعة الملوخية أو البامية مش تمام .. أو حتى بسبب الفلاح .. لو ايديها وجعوها يبقى هتسلم على حد .. لو عينيها بترف .....
(بيشوفها والد مهند ويستنكر وقفتها قدام الشباك خوفا عليها من البرد.. ولكن له طرقه الخاصة فـ التعبير)
والد مهند : فين الشاي ؟
أم مهند : قدامك
والد مهند : فين ؟
أم مهند : على الترابيزة .. انت بقيت بتنسى ؟
والد مهند : أنسى إيه .. أنا لسه فـ عز شبابي ..
أم مهند : شبابك إيه ؟ انت قربت ع السبعين
والد مهند : طب ما انتي داخلة ع الستين
أم مهند : لا بقى ده أنا...
والد مهند (بيغمزلها) : الولد صحي
أم مهند : انت اللي يشوفك يقول عندك تلاتين
والد مهند : وانتي كمان .. الحق يتقال
....
‫#‏مهند‬
* فـ شارع قريب من شركة عم ريم*
(مهند ساند على عربية . بيشوف ريم جاية بيقف ويقرب عليها .. لأول مرة بيقفوا قدام بعض .. هوا أطول منها بشوية حلوين)
ريم : مهند
مهند : ريم
ريم (بتبصله لفوق) : إزيك
مهند : الحمد لله .. ايه اللي بيحصل عندك ؟
ريم : تعالى نتمشى وهحكيلك
مهند : يلا
ريم : عارف عماد اللي بيقعد جنبك ؟
مهند : جنبي فين ؟
ريم : الكورس
مهند : آه .. ماله
ريم : عرف رقمي وعنواني وجه خطبني
مهند : ....
ريم : مالك تنحت كده ليه ؟
مهند : لا .. مفيش .. ربنا يسعدكوا .. انتي جايه عشان تقوليلي مكلمكيش تاني فـ الكورس حاضر أنا هبعد....
ريم : يابني استنى بس لما افهمك
مهند : اتفضلي
ريم : أنا مش طايقاه أصلا .. وبلغت عمي الكلام ده ..
مهند : وبعدين
ريم : مفيش .. عمي سألني في حد تاني ؟
مهند : أيوة ؟
ريم : فقلتله عليك
مهند (بيلطم) : حبيبة عمو .. قلتيله على مين ؟
ريم : عليك يا مهند
مهند : اه
ريم : بس.. فقاللي لو هيتقدملك خليه يعدي عليا دلوقتي
مهند (بيخبي وشه): كمان دلوقتي ؟
ريم (بتبصله بنظرة استعطاف) : هترفض صح ؟
مهند : أنا بتدبس كده ؟
ريم : ههههههههه بالظبط كده
مهند : يخربيت براءتك .. موافق طبعا
ريم : موافق على ايه يا مجنون ؟
....
‫#‏إيمان_أحمد‬
أحمد : يلا بينا نفطر فطار ملوكي يا مزة
إيمان : يلا يا اخويا ومالو
(قدام المطعم بيمثل إنه بيدور فـ جيوبه على فلوس )
أحمد : شكلي نسيت المحفظة فـ البيت
إيمان : معايا فلوس
أحمد : لا يا هانم لست أنا هذا الرجل
إيمان (بتزقه فـ كتفه) : يا عم امسك متخلنيش أتغابى عليك
أحمد (ماسك كتفه) : يدوم يا عرب .. كام دول ؟ .. آه عشرين ماشي
إيمان : يلا خش هاتلنا بقى سندوتشات ..
(بيدخل عند الراجل وبيجيب سندوتشات فول وطعمية وبيحط الباقي فـ جيبه وبيطلع)
أحمد (مشى لقدام خطوتين): يلا ناكل
إيمان (واقفة مكانها): أحمد
أحمد (بيبص وراه): نعم يا أمي
إيمان : باقي الفلوس يا روح أمك
....
مهند : موافق على كل حاجة
ريم : انت فعلا مجنون
مهند : ريم فعلا أنا مجنون من يوم ما عرفتك
ريم : طب حيث كده .. ركز معايا
مهند : حاضر
ريم : عمي شخصية صعبه .. زي أي مدير شركة .. بيركزفـ التفاصيل ..وبيعرف يقرا العيون .. فلازم تكون جد جدا .. وفـ نفس الوقت تبقى عارف إنت عاوز إيه ؟
مهند : متقلقيش
ريم : لازم تاكله فـ الكلام
مهند : حاضر
ريم : لازم تتغدى بيه قبل ما يتعشى بيك
مهند (ضاحكا): إيه جو سي بي سي سفره ده يا ريم ؟
ريم: تصدق أنا غلطانة اني بعرفك تعمل ايه
مهند : ماشي . خلاص حاضر .. طب في حاجة تانية ؟
ريم : لا حاول بس تاكل بعقله حلاوة
مهند : عليا الطلاق انتي جعانة يا ريم ؟
ريم : عرفت منين ؟
مهند : كلامك كله حلو وحادق .. يلا نفطر
ريم : أنا عازماك
مهند : لما يبقى مش معايا إبقي إعزميني
ريم : وفيها ايه ؟
مهند (بيبص فـ عينيها مباشرة وبصوت واطي): هسسس خالص .. انتي مسؤولة مني
ريم (تكتفي بالنظر لـ مهند)
مهند (بيغمزلها بعين واحدة)
ريم ( بتبتسم )
مهند ( بيغمزلها بعينيه الاتنين)
ريم ( بتضحك وايدها على بؤها وبتبص للناحية التانية)
مهند ( بيبص للسما وليها )
ريم ( بتبص لعينيه وللأرض )
....
‫#‏الجاكيت‬
(الشتا بدأ يشد حيله .. إيمان نسيت الجاكيت بتاعها فـ البيت وبردانة جدا)
أحمد :لا أنا جدع أوي وأعجبك
إيمان (بتبص لجاكيت أحمد ) : يعني لو حبيبتك بردانة .. تعمل ايه ؟
أحمد : بقولك جدع أوي وأعجبك .. بجد عيب السؤال ده ..
إيمان (مركزة مع الجاكيت ) : طيب هوا الجاكيت ده جلد ؟
أحمد : آه جلد واهدي بقى .. مش هقلعه
....
ريم : خلي بالك على نفسك يا مهند
مهند (بيتحسس وشه ): هوا عمك صعب أوي كده
ريم : انت كبرت فـ نظري أوي
مهند : أنا ما صدقت أصلا
ريم : يعني إنت مش رايحله غصب عنك ؟
مهند : إحنا ثقة فـ الله هننجح
...
‫#‏فستان_بدلة‬
*وقفوا قدام محل فساتين عرايس وبدل *
إيمان : الله .. ده اللي هحضر بيه فرحي ان شاء الله
أحمد : ده ده ؟
إيمان : أيوة ده
أحمد : الفستان ده كامل كده ؟
إيمان : أيوة شايف حلو إزاي سيمبل أوي..
أحمد : بس ده قصير لحد الركبة
إيمان : آه استايله كده
أحمد : بس ده هيبين رجلك كلها
إيمان : أنا كنت فاكراك متفتح أكتر من كده
أحمد : لا ما انا متفتح خالص .. أنا كنت بهزر بس
إيمان : يابني عادي دي ليلة فـ العمر
أحمد : على رأيك ..دي ليل.....
إيمان : وانت هتلبس أنهي بدلة فـ دول ؟
أحمد : لا أنا هحضر بالأندر وير عادي
....
أم مهند : اشمعنى جايب حلاوة المولد صافيناز
والد مهند : اهو اللي لقيته
أم مهند : كل الرجالة كده مهما كبرتوا
والد مهند : وفي حد يكره صافيناز ؟
أم مهند : ياشيخ بلا قرف .. والله عيب
والد مهند (بيغمزلها) : في حد بيخبط ع الباب شكل الولد رجع
أم مهند : طب ليه مجبتش حلاوة من العادية ؟
والد مهند : التانية خلصت ملقتش غير دي ؟
أم مهند : ولا يهمك كل سنة وانت طيب
والد مهند : وانتى طيبة وبخير يا حبيبتي
...
*أمام سكرتارية المدير العام*
- حضرتك إيه سبب الزيارة ؟
مهند : قوله بس مهند وهوا هيعرف
- يعني حضرتك ف ميعاد مسبق ؟
مهند : بالظبط كده
- طب ثانية واحده
(يدخل السكرتير إلى المكتب ثم يعود بعد دقيقة)
- اتفضل حضرتك .. هوا في انتظارك
(مكتب فخم تحيطه الورود وخلف المكتب يجلس رجل تبدو عليه البدانة .. له شارب كثيف .. ذو نظرة ثاقبة .. تظهر حول عينيه تجاعيد خلفتها ليالِ طوال .. في داخل عينيه أهدافا تحققت وأخرى في الطريق )
عم ريم : اتفضل أقعد
مهند : شكرا حضرتك
عم ريم : تشرب إيه
مهند : أي حاجة حضرتك
عم ريم : أنا هاخد قهوة وانت ؟
مهند : ماشي قهوة حضرتك
(يطلب القهوة في الهاتف)
عم ريم : ها .. ممكن أفهم عرفت ريم إزاي ؟
مهند : إحنا مع بعض فـ كورس ..
عم ريم : آه كورس انجليزي
مهند : تمام حضرتك
عم ريم : طيب انت خلصت كلية إيه ؟
مهند : أنا لسه فـ سنة رابعة حقـ..
عم ريم : لسه بتدرس ؟
مهند : أيوة حضرتك بس دي آخر سنة
عم ريم : طيب انت عندك شقة؟
مهند : لسه بس هـ...
عم ريم : عندك وظيفة ثابتة ؟
مهند : أنا بكتب سكريبتات ...
عم ريم : انت عاوز إيه من ريم ؟
....................................

• 

•