ريم ومهند الحدوتة الحادية عشر

الحدوتة الحادية عشر ....،
‫#‏ريم_مهند‬
........................................
(مكتب فخم تحيطه الورود وخلف المكتب يجلس رجل تبدو عليه البدانة .. له شارب كثيف .. ذو نظرة ثاقبة .. تظهر حول عينيه تجاعيد خلفتها ليالِ طوال .. في داخل عينيه أهدافا تحققت وأخرى في الطريق )
عم ريم : اتفضل أقعد
مهند : شكرا حضرتك
عم ريم : تشرب إيه
مهند : أي حاجة حضرتك
عم ريم : أنا هاخد قهوة وانت ؟
مهند : ماشي قهوة حضرتك
(يطلب القهوة في الهاتف)
عم ريم : ها .. ممكن أفهم عرفت ريم إزاي ؟
مهند : إحنا مع بعض فـ كورس ..
عم ريم : آه كورس انجليزي
مهند : تمام حضرتك
عم ريم : طيب انت خلصت كلية إيه ؟
مهند : أنا لسه فـ سنة رابعة حقـ..
عم ريم : لسه بتدرس ؟
مهند : أيوة حضرتك بس دي آخر سنة
عم ريم : طيب انت عندك شقة؟
مهند : لسه بس هـ...
عم ريم : عندك وظيفة ثابتة ؟
مهند : أنا بكتب سكريبتات ...
عم ريم : انت عاوز إيه من ريم ؟
مهند : أنا عارف إن ظروفي صعبة وعارف إني معنديش شغل ثابت وعارف إن معنديش شقة .. لكن كمان عارف إني بحب ريم وحضرتك هيا نفسها متعرفش إني بحبها .. أنا كل اللي طالبه مهلة السنادي وأنا هعمل كل اللي حضرتك عاوزه .. مبدأيا أنا لقيت شغل بعد الضهر .. وكمان أنا طموحي ملوش حدود ..
عم ريم : بس كل ده مش كافي إني أجوزهالك
مهند : طيب أنا هعمل المستحيل
عم ريم : على فكرة أنا مش ضدك يا ابني .. أنا عاوزك تفكر معايا كده .. أنا كأب متقدم لبنته اتنين .. الاتنين شباب زي الفل ربنا يحميكم .. بس واحد جاهز وشغله محترم ومعاه عربيته وبيحبها .. والتاني لا يملك إلا الحب .. ها انت لسه هتجادل ؟
مهند : أنا مش هتنازل عنها وهعمل أي حاجة عشانها
عم ريم : متأكد؟
مهند: طبعا
عم ريم : طب ثانية واحدة هعمل مكالمة
مهند : اتفضل
( يخرج من المكتب ليجري مكالمة مع عماد )
عم ريم : السلام عليكم
عماد : إزيك يا عمي حضرتك عامل إيه ؟
عم ريم : الحمد لله .. عماد ينفع تعدي عليا دلوقتي ؟
عماد : حاضر هاخد إذن نص ساعة
عم ريم : وهو كذلك .. أنا مستنيك .. مع السلامة
(يعود لـ مهند )
عم ريم : البن ده محوج على فكرة
مهند : تسلم إيدك حضرتك
عم ريم : آه بيجيلي مخصوص
مهند : فعلا طعمه مختلف
عم ريم : ثواني وهرجعلك انت عارف ضغط الشغل
مهند : فاهم حضرتك اتفضل
(يخرج من المكتب مرة أخرى ليجري مكالمة مع ريم )
ريم : إيه يا عمي حصل حاجة ؟
عم ريم : إنتي فين ؟
ريم : بشتري حاجات من المول اللي جنب الشركة
عم ريم : طيب تعاليلي عاوزك
ريم : حاضر
(يجري مكالمة مع استقبال العملاء)
- تحت امرك يا افندم
المدير العام : مين معايا
- معاك محمد سعيد يا فندم
المدير العام : يا محمد انت عارف ريم بنت اخويا
- طبعا يا افندم
المدير العام : طيب أول ما تيجي خدها على غرفة المتابعة الأمنية والكاميرات ..
- حاضر سعادتك
المدير العام : وهيجيلك شاب إسمه عماد
- (بيكتب) ثواني يا فندم "عماد" .. أيوة حضرتك
المدير العام : وصله بقى لمكتب نائب المدير وخليه هناك لحد ما أجيله
- أوامر يا افندم
(يجري مكالمة مع مدير المتابعة الامنية)
- أكرم بيه إزيك يا فندم
المدير العام : ركزي معايا يا سلوى فـ اللي هقلهولك
....
‫#‏إيمان_أحمد‬
أحمد : إيه يا هيما .. يابني علّي صوتك شوية .. دكتور ايه .. ليه .. طب بسنت معاك ؟ .. طب قولي النتيجة .. هستنى مكالمتك .. خير متقلقش.. سلام.
إيمان : مين
أحمد : لا ده ابراهيم أخويا شكله عاملي مقلب من مقالبه
إيمان : مين بسنت ؟
أحمد : دي خطيبته يا ستي
إيمان : طب هات إيدك عشان نعدي السكة
أحمد : لا بعرف أعدي لوحدي
(إيمان بتمسكه من كوعه وتشده لحد ما عدوا السكة)
أحمد: إنتي بتلعبي حديد يا بت انتي
إيمان (بفرحة) : إيديا علمت صح ؟
أحمد (بيفرد إيده ويرجعها) : يخربيت غباوتك
إيمان : كده يبقى أنا علمت عليك
أحمد : ليه العنف ده يا أبو إيمان ؟؟
إيمان : أنا كنت خايفة عليك يا بيبي
أحمد : بيبي؟ أنا بيبي ؟
إيمان : إنت تطول يااض
أحمد : هوا حد قالك إنك بيئة قبل كده ؟
(واحد معدي بيبص على الموقف كله وعلى إيمان )
إيمان : بتبص على إيه يا حيلتها ؟
- هوا حد جه جنبك .. انتي هترمي بلاكي علينا؟
إيمان : أنا هوريك البلا يا روح خالتك
أحمد : خلاص يا ايمان
إيمان (بتزق أحمد ) : إوعى انت كده
(بتنقض علي الراجل ومسكاه من رقبته .. بتوجهله مجموعة ضربات مختلفة النوع والشكل والتوجه..الراجل بيفرفر منها .. الناس بتحوش المسكين من إيدها .. وأحمد بيتفرج)
راجل بيسلك الخناقة: هوا انت مش معاها يا أفندي ؟
أحمد : تقريبا
- طب ما توقفها عند حدها .. كده عيب
أحمد : ها ها ها .. أوقفها عند حدها ؟ .. لو تقدر انت اتفضل
(الراجل بيبصله من تحت لفوق )
أحمد : والله شكلي هناديهالك
(الراجل اختفى )
....
المدير العام : ها يا محمد طمني ؟
- تمام يا فندم آنسة ريم فـ المتابعة وأستاذ عماد فـ مكتب نائب المدير
المدير العام : ماشي يا محمد شكرا
....
إبراهيم : انت متأكد يا دكتور ؟
دكتور أسامة: بص يا ابراهيم .. فحوصات الدم والبول بتاعتك بتأكد ده .. عاوزأفهمك كام نقطة مهمين ..
إبراهيم : اتفضل يا دكتور
دكتور أسامة : الكليتين بيصفوا الدم وبيفرزوا الفضلات وفائض السوايل للبول .. لما يقل نشاط الكلية بتتراكم الفضلات وفائض السوايل دي فـ الجسم .. يهمني مع العلاج متاكلش بروتينات كتير وتقلل الملح والسكر .. هتشرب ماية معدنية وتهتم بالرياضة شوية حتى لو ربع ساعة يوميا وتبطل السجاير .. فاهمني ؟
إبراهيم : حاضر يا دكتور
دكتور أسامة: متقلقش خير ان شاء الله
إبراهيم : يارب
....
(ريم تتابع بالصوت والصورة من أمام الكاميرات)
المدير العام : بص يا مهند
مهند : اتفضل
المدير العام : انا معنديش مانع تتجوز بنتنا
مهند (بفرح) : يعيش أكرم بيه.. يا يعيـ....
أكرم بيه : بس بشرط
مهند : شرط ؟ ايه هوا ؟
أكرم بيه : تمضي على ورقة صغيرة
مهند : ورقة إية ؟
أكرم بيه : وصل أمانه على بياض نضمن بيه حق البنت
مهند : أنا ...
أكرم بيه : متردش دلوقتي .. الوصل قدامك أهو .. هسيبك عشر دقايق
(يخرج إلى مكتب نائب المدير )
أكرم بيه : اتأخرت عليك
عماد : براحتك يا عمي
أكرم بيه : أنا معنديش مانع تتجوز بنتنا
عماد (يقف سعيدا ) : قرار حكيم
أكرم بيه : بس عندي شرط صغير
عماد : موافق
أكرم بيه : طب اسمع الاول
عماد : قول حضرتك
أكرم بيه : هتمضيلي إيصال الامانة ده .. وهوا على بياض على فكرة زي ما انت شايف ..
عماد : أنا ..
أكرم بيه : متردش دلوقتي .. الوصل قدامك أهو .. هسيبك عشر دقايق
....
#إيمان_أحمد
أحمد : عجبك الفضايح دي ؟
إيمان : أعمله إيه يا بيبي ؟ ما هوا اللي مش متربي
أحمد : أيوه بس كده كتير
إيمان : سامحني يا أبو احمد
أحمد : مسامحك يا سندي
(مرورا على محل عصير )
إيمان : تعالى نشرب قصب
أحمد : أنا عاوز مانجة
إيمان (للبائع) : اتنين قصب هنا يابلادينا
أحمد (للبائع) : لا اتنين مانجة
إيمان (للبائع) : انا قولت قصب
أحمد (للبائع) : هيا قفلت بقى .. اتنين مانجة
إيمان (للبائع) : عليا الطلاق ليشرب قصب
(البائع بينظر لـ أحمد منتظرا منه أن يأخذ قرارا جريئا حاسما )
أحمد : حكم القوي .. متبصليش يا اخويا .. نزل قصب وانت ساكت
....
*فـ بيت بسنت*
إبراهيم : نتيجة التحليل طلعت
بسنت : طيب طمني
إبراهيم : للأسف الشك طلع فـ محله
بسنت : ....
إبراهيم : العلاج هياخد وقت
بسنت : ...
إبراهيم : بس أنا متفائل بوجودك جنبي
بسنت : ...
إبراهيم : يعني مبترديش
بسنت : ها ؟
إبراهيم : مبترديش يا بوسي
بسنت : مش عارفة أقولك إيه ؟
إبراهيم : قصدك إيه ؟
....
أكرم بيه : ودلوقتي جه وقت النتيجة يا ريم
ريم (خايفة) : ليه كل ده يا عمي ؟
أكرم بيه : أنا خبرتي بالدنيا أضعاف أضعافك .. دلوقتي هتعرفي كل حاجة .. جاهزة يا سلوى ؟
سلوى : جاهزة يا افندم
أكرم بيه : وريها ردود أفعال الاتنين
(بيظهر عماد ماسك القلم ومقرب جدا من الورقة .. وبيظهر مهند وهوا بعيد عن الورقة وهادي جدا )
أكرم بيه : ودلوقتي هنعرف النتيجة
(يذهب المدير العام إلى حيث يتواجد مهند وعماد )
....................................

• 

•